SİYASƏT
Milli Məclisin plenar iclasında bir sıra qanunlarda dəyişikliklər edilib
Bakı, 6 may, Təhminə Hümbətova, AZƏRTAC
Mayın 6-da Azərbaycan Respublikası Milli Məclisinin növbəti plenar iclası keçirilib.
AZƏRTAC xəbər verir ki, iclasın gündəliyinə 16 məsələ daxil idi.
İclasda əvvəlcə Qürbət Əsgərov, Vəfaddin İbayev və Zakir Quliyevin Ali Məhkəmənin, Rəşadət Ağayevin Şirvan Apellyasiya Məhkəməsinin hakimləri təyin edilməsi məsələsinə müsbət münasibət bildirildi.
Azərbaycan və Türkiyə hökumətləri arasında diplomatik nümayəndəlik və konsulluqların əməkdaşlarının ailə üzvlərinin haqqı ödənilən əmək fəaliyyəti ilə məşğul olmaları haqqında, eləcə də sürücülük vəsiqələrinin qarşılıqlı tanınması və dəyişdirilməsi haqqında sazişlər, texniki əməkdaşlıq haqqında Protokol, həmçinin Azərbaycan və Rumıniya hökumətləri arasında xidməti pasportlara malik olan şəxslərin vizadan azad edilməsi haqqında Saziş təsdiqləndi.
Plenar iclasda Miqrasiya, Cinayət, İnzibati Xətalar, Vergi məcəllələrində, “Sosial sığorta”, “Gömrük tarifi”, “Banklar”, “Sığorta fəaliyyəti” haqqında qanunlarda da dəyişikliklər edildi.
“Sosial sığorta”, “Gömrük tarifi” haqqında qanunlarda, Miqrasiya və Vergi Məcəlləsində edilən dəyişiklik dövlət başçısının Qaradağ Sənaye Parkının yaradılması haqqında müvafiq Sərəncamının icrasının təmin edilməsi məqsədini daşıyır. Belə ki, yeni sənaye sahəsi olan gəmiqayırmanın uzunmüddətli inkişafını təmin etmək məqsədilə bu fəaliyyətlə məşğul olan şəxslərin fəaliyyətin məqsədləri üçün idxal etdikləri bütün növ malların idxalı bu il mayın 1-dən 5 il müddətinə gömrük rüsumlarından və əlavə dəyər vergindən azad ediləcək. Gəmiqayırma fəaliyyətinin məqsədləri üçün malların təqdim edilməsi, işlərin görülməsi və xidmətlərin göstərilməsi əlavə dəyər vergisinə sıfır faiz dərəcəsi ilə cəlb olunacaq. Bu fəaliyyətə cəlb olunan əcnəbilər də 5 il müddətinə məcburi dövlət sosial sığortadan azad ediləcək. Bu məqsədlə ölkəyə gələn əcnəbilər və vətəndaşlığı olmayan şəxslər iş icazəsinin alınmasından azad olunacaq və onlara müvəqqəti yaşamaq hüququ veriləcək.
Vergi Məcəlləsində edilən daha bir dəyişiklik isə kənd təsərrüfatı məhsullarının istehsalını stimullaşdırmaq məqsədini daşıyır. Məcəllənin 164-cü maddəsində kənd təsərrüfatı məhsullarının istehsalında istifadə edilən malların idxalının və ölkə daxilində satışının əlavə dəyər vergisindən azad edilməsi nəzərdə tutulur. Bu, yerli istehsalın maya dəyərini aşağı salmaqla, rəqabətə davamlı ixrac məhsullarının istehsalının artırılmasına imkan yaradacaq.
Digər bir dəyişikliyin isə kənd təsərrüfatı təyinatlı torpaqlardan istifadəni stimullaşdırmaq üçün məcəllənin XIV, yəni, “Torpaq vergisi” fəslinə edilməsi təklif olunur. Belə ki, kənd təsərrüfatı təyinatlı və bu məqsədlərə istifadə üçün yararlı olan, lakin istifadəsiz qalan torpaq sahələri üzrə vergi yükünün artırılması nəzərdə tutulur. Bu da öz növbəsində mülkiyyətçilər tərəfindən belə torpaqlardan geniş istifadə edilməsinə, qeyri-neft sektorunun əsas istiqamətlərindən olan kənd təsərrüfatı istehsalının genişləndirilməsinə zəmin yaradacaq.
“Azərbaycanda iqtisadi islahatların yeni mərhələsi başlayıb”, - deyən Milli Məclisin iqtisadi siyasət, sənaye və sahibkarlıq komitəsinin sədri Ziyad Səmədzadə dəyişikliklərin qeyri-neft sektorunun inkişafı baxımından zəruri olduğunu bildirdi. Diqqətə çatdırıldı ki, məcəlləyə dəyişiklik kənd təsərrüfatını inkişaf etdirməklə bu sahədə investisiya qoyuluşları üçün daha əlverişli imkanların yaradılmasına, biznes mühitinin daha da yaxşılaşdırılmasına, qeyri-neft ixrac potensialının artırılmasına təkan verəcək.
İclasın gündəliyindəki digər məsələ “Antidempinq, kompensasiya və mühafizə tədbirləri haqqında” qanun layihəsi barədə idi. Ziyad Səmədzadə dedi ki, layihənin birinci oxunuşda müzakirəsi zamanı deputatların səsləndirdiyi təklif və tövsiyələrin müvafiq sayılanları nəzərə alınıb. Qanun ölkənin iqtisadi maraqlarının müdafiəsi məqsədilə yerli istehsal sahəsinə zərər vuran və ya zərər vurma təhlükəsi yaradan dempinqli, subsidiyalaşdırılan və ya artmış idxala qarşı antidempinq, kompensasiya və mühafizə tədbirlərinin tətbiqi qaydalarını tənzimləyəcək.
Milli Məclis sədrinin müavini Valeh Ələsgərov qanun layihəsinin beynəlxalq qurumların və sənədlərin tələblərinə uyğun hazırlandığını bildirdi.
Layihə ikinci oxunuşda səsvermə ilə qəbul olundu.