Milli Məclisin təhlükəsizlik və müdafiə komitəsinin iclasında bir sıra qanun layihələri müzakirə olunub
Bakı, 16 sentyabr, AZƏRTAC
Sentyabrın 16-da Milli Məclisin təhlükəsizlik və müdafiə komitəsinin iclası keçirilib.
AZƏRTAC xəbər verir ki, iclasda Milli Məclis sədrinin birinci müavini, komitə sədri Ziyafət Əsgərov gündəlikdə duran məsələlər barədə məlumat verib.
Azərbaycan hökuməti ilə Türkiyə hökuməti arasında xüsusi təyinatlı qüvvələrin Anlaşma Memorandumunun təsdiq edilməsi haqqında qanun layihəsi müzakirələrdən sonra plenar iclasa tövsiyə edilib.
Bundan başqa, hərbi qulluqçuların statusu haqqında qanuna dəyişiklik, hərbi xidmətkeçmə haqqında Əsasnamədə dəyişikliklər edilməsi barədə qanun layihəsi, Azərbaycan hökuməti ilə Özbəkistan hökuməti arasında fövqəladə halların xəbərdar edilməsi və aradan qaldırılması sahəsində əməkdaşlıq haqqında Sazişin təsdiq edilməsi barədə qanun layihələri müzakirə olunaraq plenar iclasa tövsiyə edilib.
İclasda fövqəladə hallar orqanlarında xidmətkeçmə haqqında Qanuna dəyişiklik, hərbi xidmətkeçmə haqqında Əsasnamədə dəyişiklik edilməsi məsələsinə və digər qanun layihələrinə də baxılaraq parlamentin plenar iclasına tövsiyə olunub.
Bölmənin digər xəbərləri
