SİYASƏT
“Milli Olimpiya Komitəsi ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfrans keçirilmişdir
Bakı, 13 noyabr (AZƏRTAC). Noyabrın 13-də Milli Olimpiya Komitəsində (MOK) Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) birgə təşkilatçılığı ilə “Milli Olimpiya Komitəsi ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfrans keçirilmişdir.
AZƏRTAC xəbər verir ki, konfransda KİVDF-nin icraçı direktoru Vüqar Səfərli, MOK-un vitse-prezidenti Çingiz Hüseynzadə, Azərbaycan Mətbuat Şurasının sədri Əflatun Amaşov, media orqanlarının baş redaktorları və digər qonaqlar iştirak etmişlər. Konfrans iştirakçılarını salamlayan Çingiz Hüseynzadə tədbirin əhəmiyyətindən bəhs edərək, Azərbaycanda idmanın dinamik inkişaf etdiyini və bu sahəyə yüksək diqqət olduğunu vurğulamışdır. İdmanın inkişafının mediada işıqlandırılmasının da mühüm önəm kəsb etdiyini diqqətə çatdırmışdır.
MOK və KİVDF-nin birgə təşkil etdiyi fərdi jurnalist yazılar müsabiqənin keçirilməsinin məqsədindən söz açan Vüqar Səfərli, qeyd etmişdir ki, burada başlıca məqsəd, Azərbaycanda idmanın və Olimpiya Hərəkatının inkişafının KİV-lərdə təbliğini daha da genişləndirmək və bu sahədə peşəkar idman jurnalistlərinin yaradıcılığını keyfiyyətcə yeni mərhələyə qaldırmaqdır. V.Səfərli müsabiqəyə 27 yazının təqdim olunduğunu bildirmişdir: “Müsabiqəyə daxil olan yazılar kodlaşdırılaraq münsiflərə təqdim edilmişdir. İdman spesifik sahə olduğundan yazıların qiymətləndirilməsi sırf bu sahə üzrə ekspertlərə həvalə olunmuşdur”.
V.Səfərli müsabiqə işlərini qiymətləndirən ekspertlərin adlarını açıqlamışdır: “Müsabiqədə yazıları qiymətləndirən ekspertlər Bakı şəhər Gənclər və İdman Baş İdarəsinin rəisi Raqif Abbasov, “Təhsil” respublika İdman Sağlamlıq Mərkəzinin baş direktoru Cəfər Hümbətov, Gənclər və İdman Nazirliyinin Elmi Araşdırmalar Mərkəzinin rəhbəri Qədəmşah Sadıxov olmuşlar”. Konfrans iştirakçılarına tədbirdə iştirak edən media orqanlarının baş redaktorlarını təqdim etdikdən sonra, çıxış üçün söz ekspertlərə verilmişdir.
Ekspertlərdən Raqif Abbasov müsabiqəyə təqdim olunan yazıların qiymətləndirmə meyarlarından danışmışdır. İdman jurnalistikasının mövcud durumuna toxunan natiq bu sahənin inkişafından da geniş bəhs etmişdir.
Cəfər Hümbətov və Qədəmşah Sadıxov da müsabiqəyə təqdim olunan yazılar barədə öz fikirlərini bildirmişlər.
Azərbaycan Mətbuat Şurasının sədri Ə.Amaşov isə Azərbaycan bayrağını zirvələrə qaldıran idmançılarımızın uğurlarının bütün xalq tərəfindən böyük rəğbətlə qarşılandığını və hər bir azərbaycanlını sevinc hisslərinə qərq etdiyini bildirmişdir. O, bu qəbildən olan tədbirlərin jurnalistlərin, o cümlədən idman yazarlarının yaradıcılığına müsbət təsir göstərdiyini də xüsusi olaraq vurğulamışdır. Digər çıxış və təkliflərdən sonra müsabiqə qaliblərinin mükafatlandırma mərasimi keçirilmişdir.
Belə ki, müsabiqədə birinci yer “Mövqe” qəzetinin müxbiri Mübariz Bayramova təqdim edilmişdir. 2-ci yeri “İdmançı” qəzetinin redaktoru Dilqəm Quliyev, 3-cü yeri isə “Olimpiya dünyası” qəzetinin şöbə müdiri Anar Əhmədov tutmuşlar. 7 jurnalist həvəsləndirici mükafata layiq görülmüşlər.
Qaliblər diplom, pul mükafatı və hədiyyələrlə təltif olunmuşlar.