Millimizin futzalçısı: Komandada hər kəs qələbə haqqında düşünür
Bakı, 14 sentyabr, AZƏRTAC
Yol yorğunluğuna rəğmən, Rumıniyadakı ilk məşqimiz normal keçdi. Çalışdıq ki, baş məşqçinin verdiyi tapşırıqları icra edək. Zal istənilən səviyyədə deyil. Bizdən əvvəl həndbolçular məşq etdiyi üçün örtük yapışqan idi. Ümid edirəm ki, növbəti məşqə qədər təmizləyərlər.
AZƏRTAC xəbər verir ki, bu sözləri Azərbaycan millisinin futzalçısı Amadeu DÇ-2024-ün elit-raund mərhələsində sentyabrın 15-də səfərdə Rumıniya yığmasına qarşı keçirəcəkləri oyunla bağlı danışarkən deyib.
O, komandada olan hər kəsin qələbə haqqında düşündüyünü bildirib: “Uğurlu başlanğıc növbəti oyunlarda daha yaxşı nəticə qazanmağımız üçün vacibdir. Daha bir məşqimiz var. Bütün gücümüzü səfərbər etməliyik ki, buraya qədər çəkdiyimiz əziyyətin bəhrəsini görək. Çünki Rumıniya ilə matçdan sonra Bakıda Niderlandla görüş var. Həmin oyuna qalib əhvalda çıxmaq istəyirik”.
Yığmamızın müdafiəçisi Rumıniya seçməsinin son iki oyununa baxdıqlarını vurğulayıb: “Rəqibin heyətində Braziliya əsilli 4 futzalçı var. Çox çətin oyun olacaq. Şansları qaçırmaq olmaz. Elə oyundur ki, həmin gün kim yaxşı konsentrasiya olsa, imkanları düzgün dəyərləndirsə, qələbə qazanacaq”.
Millimizin qrupdakı şanslarını da dəyərləndirən Amadeu rəqiblərlə bağlı deyib: “Rumıniya, dediyim kimi, güclü komandadır. Onlara qarşı oynamaq digər kollektivlər üçün də çətin olacaq. Niderland isə hər matçda sürpriz edə biləcək gücdədir. Bu komanda son illər inkişafdadır, heyətində fərdi qabiliyyətinə görə seçilən oyunçular var və ikili mübarizələrdə güclüdürlər. Qazaxıstan yığması haqqında isə geniş danışmağa dəyməz. Onlar son illərdə böyük yarışların final mərhələsində oynamağa adət ediblər. Qrup lideri olmaq baxımından komandamızın şansı bərabərdir”.
Bölmənin digər xəbərləri
