Millinin baş məşqçisi: İranla matçda komandamız istədiyimizi ortaya qoya bildi
Bakı, 17 fevral, AZƏRTAC
“Bizə qələbə sevinci yaşatdıqları üçün futbolçulara təşəkkür edirəm”.
AZƏRTAC xəbər verir ki, bu sözləri 17 yaşadək futbolçulardan ibarət Azərbaycan milli komandasının baş məşqçisi İlham Yadullayev AFFA-nın rəsmi saytına açıqlamasında deyib.
Mütəxəssis Belarusun paytaxtı Minskdə təşkil edilən İnkişaf Kubokunda İran yığmasına 1:0 hesabı ilə qalib gəldikləri oyunu şərh edib: “Dünən keçirdiyimiz ilk oyunda güclü Rusiya (0:3) millisi ilə qarşılaşdıq. Uşaqlar tapşırıqlarımızı yerinə yetirməyə çalışırdılar. Turnirdə birinci görüşümüz olduğundan, futbolçularda start həyəcanı var idi. Yaxşı nəticə üçün hücuma atıldıq, qapımızda qollar gördük. Komandanı qısa müddətdə bugünkü oyuna hazırlaya bildik. Hər gün oyun keçirmək çətindir. Tam bərpa olunmaq mümkün olmur. Yeni heyət qururuq, yeni futbolçulara baxırıq. İranla matçda komandamız istədiyimizi ortaya qoya bildi. Bu da nəticədə öz əksini tapdı”.
Qeyd edək ki, U-17 qrupda son oyununu fevralın 19-da, Bakı vaxtı ilə saat 14:20-də Qazaxıstan yığmasına qarşı keçirəcək.
Bölmənin digər xəbərləri
