Milorad Dodik: Serbska Respublikası heç kimin müstəmləkəsi olmayacaq
Belqrad, 9 yanvar, AZƏRTAC
“Serbska Respublikası bu gün öz suverenliyini, kimliyini və ənənəsini qeyd edir və əbədiyyət üçün doğulduğuna görə heç kimin müstəmləkəsi olmağa razı deyil”.
AZƏRTAC xəbər verir ki, bu sözləri Bosniya və Herseqovinanın Serbska Respublikasının Prezidenti Milorad Dodik deyib.
“Bu gün - 33 il əvvəl Serbska Respublikasının şərəflə qurulduğu və elan edildiyi gündə biz birdən çox tarixi qeyd edirik: suverenliyimizi, kimliyimizi və ənənəmizi. Sülhə sadiq qalaraq, həqiqət və birlik üçün müqəddəs Serbska Respublikasını qorumağa davam edəcəyik”.
Bosniya və Herseqovina iki inzibati vahiddən biri olan Serbska Respublikası yanvarın 9-da Respublika Gününü və 33 illiyini “Əbədiyyət üçün doğuldu” şüarı ilə qeyd edir. Bu münasibətlə Banya Luka şəhərində keçirilən mərasimdə Serbiyanın Baş naziri Miloş Vuçeviç, Milli Assambleyanın sədri Ana Brnabiç və digər rəsmi şəxslər iştirak ediblər.
Qeyd edək ki, Bosniya və Herseqovina iki inzibati vahiddən - Serbska Respublikası ilə Bosniya və Herseqovina Federasiyasından, eləcə də xüsusi statusa malik Brçko bölgəsindən ibarətdir.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
