MİNGƏÇEVİR XƏBƏRLƏRİ
Azərbaycan Dövlət Rayon Elektrik Stansiyasının 16 işçisi ölkəmizin ərazi bütövlüyü uğrunda döyüşlərdə şəhid olmuşdur. Stansiyanın qarşısındakı geniş meydanda şəhid energetiklərə xatirə abidəsi ucaldılmışdır. Abidənin açılış mərasimində çıxış edənlər işğal altındakı torpaqlarımızın Azərbaycan Prezident Heydər Əliyevin məqsədyönlü siyasəti nəticəsində sülh yolu ilə azad ediləcəyinə ümid bəslədiklərini, eyni zamanda, lazım gələrsə, hər an silaha sarılmağa hazır olduqlarını bildirmişlər.
X X X
“Azyolmaş” İstehsal Birliyi səhmdar cəmiyyətə çevrildikdən sonra müəssisədə texnoloji proseslər yenidən bərpa olunmuş, 250 nəfər əvvəlki iş yerinə qayıtmışdır. Onların 45 nəfəri məcburi köçkün və şəhid ailələrinin üzvləridir. İndi müəssisədə kənd təsərrüfatı maşınları üçün 20 adda qovşaq və ehtiyat hissələri buraxılır. Sifarişlərə vaxtında və keyfiyyətlə əməl edilir. Burada hazırlanan iki və üçvətərli yolbasan maşınların texniki göstəriciləri xarici ölkələrin mütəxəssislərində də maraq doğurmuşdur.
X X X
Tarixçi və arxeoloq alimlərimiz sübut etmişlər ki, Mingəçevir ərazisində aşkar olunmuş insan məskənlərinin, maddi və mədəniyyət nümunələrinin beş min ildən çox yaşı vardır.
Şəhərin girəcəyi yaxınlığında “Qədim Mingəçevir” abidə kompleksinin inşasına başlanmışdır. Abidə sahibkarların, müəssisə və təşkilatların bu məqsədlə yaradılmış fonda könüllü keçirdikləri vəsait hesabına inşa edilir. Layihənin müəllifi memar Elman Lələyevdir. Ətrafda geniş abadlıq, yaşıllaşdırma işləri də aparılır.
Bölmənin digər xəbərləri
