MİNGƏÇEVİRDƏ DÖVLƏT PROQRAMININ İCRASINA HƏSR OLUNMUŞ MÜŞAVİRƏ KEÇİRİLMİŞDİR
AZƏRTAC-ın müxbiri xəbər verir ki, 27 şəhər və rayonun İcra hakimiyyəti başçılarının, bank, maliyyə, statistika, aqrar-sənaye qurumları rəhbərlərinin, fermer və sahibkarların iştirakı ilə keçirilən müşavirəni giriş sözü ilə Prezidentin İcra Aparatı ərazi idarəetmə orqanları ilə iş şöbəsinin müdiri Yusif Hümbətov açmışdır. İqtisadi inkişaf naziri Fərhad Əliyev geniş məruzə etmişdir. Natiq ölkəmizin əhalisinin 27 faizini, ərazisinin isə 36 faizini təşkil edən Aran, Şəki-Zaqatala və Yuxarı Qarabağ regional iqtisadi rayonlarının torpaq, xammal, sənaye-istehsal, kənd təsərrüfatı, enerji ehtiyatlarını səciyyələndirmiş, perspektiv inkişaf imkanlarını təhlil etmiş, Dövlət Proqramında müəyyən olunmuş vəzifələrin vaxtında yerinə yetirilməsi işinə, əsası ümummilli liderimiz Heydər Əliyev tərəfindən müəyyənləşdirilmiş, son bir neçə ayda isə xüsusi keyfiyyət mərhələsinə qədəm qoymuş regionların sosial-iqtisadi tərəqqisinə Azərbaycan Prezidenti İlham Əliyevin göstərdiyi qayğı və diqqətin mahiyyətini, proqramın dövlətçiliyimizin daha da möhkəmlənməsinə yönəldilmiş tarixi-siyasi əhəmiyyətini şərh etmişdir.
Müşavirə iştirakçıları ayrı-ayrı rayonlarda Dövlət Proqramının icrası üçün görülən tədbirlərdən, qarşıya çıxan maneələrdən danışmış, təkliflər vermişlər.
İqtisadi inkişaf naziri Fərhad Əliyev müşavirə iştirakçılarını narahat edən məsələlərə aydınlıq gətirmiş, sualları cavablandırmışdır.
Müşavirəyə Prezidentin İcra Aparatı ərazi idarəetmə orqanları ilə iş şöbəsinin müdiri Yusif Hümbətov yekun vurmuşdur.
Bölmənin digər xəbərləri
