MİNGƏÇEVİRDƏ FUTBOL ÜZRƏ RESPUBLİKA TURNİRİ KEÇİRİLMİŞDİR
AZƏRTAC xəbər verir ki, Mingəçevir şəhərində yeniyetmələr arasında əməkdar məşqçi Baba Mustafayevin xatirəsinə həsr olunmuş futbol turniri keçirilmişdir. Respublikanın tanınmış məşqçilərindən olan mərhum B.Mustafayevin təkcə Azərbaycanda deyil, keçmiş SSRİ-də futbolun inkişafı üçün müstəsna xidmətləri olmuşdur.
Gənclər və İdman Nazirliyi və Azərbaycan Futbol Federasiyası Assosiasiyasının dəstəyi ilə Mingəçevirin Şəhər Gənclər və İdman İdarəsinin təşkil etdiyi yarışda yerli komanda ilə yanaşı, Gəncə, Şəki, İmişli, Yevlax, Əli Bayramlı, Qəbələ, Bərdə, Şəmkir və Xocalı rayonlarının yeniyetmə futbolçuları iştirak etmişlər.
Y.Məmmədzadə adına Mingəçevir şəhər stadionunda keçirilən turnirin açılışında çıxış edən şəhər gənclər və idman idarəsinin rəisi Ramiz Əliyev qeyd etmişdir ki, yarışın keçirilməsindən məqsəd ölkəmizin şəhər və rayonlarında futbolun təbliği və inkişaf etdirilməsi, futbolçuların oyun bacarığının artırılması, perspektivli yeniyetmə futbolçuların aşkarlanması, eləcə də idmançılar arasında ənənəvi dostluq əlaqələrini yaşatmaq və onlarda vətənpərvərlik ruhunu yüksəltməkdən ibarətdir.
Dörd gün davam edən turnirdə Mingəçevirin “Ulduz” komandası birinci, İmişlinin “MKT-Araz-3” və Gəncənin “Kəpəz” komandaları müvafiq olaraq 2-3-cü yerləri tutmuşlar. Komandalara kubok, diplom və qiymətli hədiyyələr verilmişdir.
Bölmənin digər xəbərləri
