Bakı, 10 dekabr, AZƏRTAC

Dekabrın 10-da Mingəçevir şəhərində “Qloballaşan dünyada ənənəvilik və müasirlik” mövzusunda regional konfrans keçirilib.

AZƏRTAC xəbər verir ki, iştirakçılar əvvəlcə Ulu Öndər Heydər Əliyevin Mingəçevir şəhərindəki abidəsini ziyarət edib, önünə gül dəstələri qoyaraq, əziz xatirəsinə ehtiramlarını bildiriblər.

Konfrans Azərbaycan Respublikasının Dövlət Himninin səsləndirilməsi ilə başlayıb. Daha sonra Ümummilli Liderin və şəhidlərin əziz xatirəsi bir dəqiqəlik sükutla yad edilib.

Mingəçevir Şəhər İcra Hakimiyyətinin başçısı İlham İsmayılov çıxışında Ulu Öndər Heydər Əliyevin Azərbaycanın özünəməxsus dövlət-din münasibətləri modelinin formalaşması, milli-mənəvi dəyərlərin qorunub saxlanması istiqamətindəki misilsiz xidmətlərindən danışıb. Bildirib ki, Ümummilli Liderin siyasi varisi Prezident İlham Əliyevin milli-mənəvi, tolerant, multikultural dəyərlərin inkişafına göstərdiyi diqqət nəticəsində Mingəçevir şəhərində də dilindən, dinindən, etnik mənsubiyyətindən asılı olmayaraq hər bir vətəndaş üçün normal, hüquqi, demokratik mədəni və mənəvi mühit yaradılıb.

Dini Qurumlarla İş üzrə Dövlət Komitəsinin sədri Ramin Məmmədov mühüm məsələlərin müzakirəsi və faydalı təcrübə baxımından keçirilən silsilə regional konfransların müsbət təsirindən danışıb. Komitə sədri qloballaşan dünyanın yeni reallıqlarını qəbul etməklə yanaşı, milli-mənəvi dəyərlər və adət-ənənələrə sədaqətimizi Azərbaycan dövlətini güclü edən əsas amillərdən biri kimi dəyərləndirib. Din amilindən bəzi hallarda məqsədli şəkildə cəmiyyəti parçalamaq, milli şüurda ziddiyyətlər yaratmaq üçün istifadə edilməsinin mənfi təzahürlərinə də toxunan R.Məmmədov söyləyib ki, əsas məqsədlərdən biri dinin bu cür yanlış interpretasiyasını dəyişməkdən ibarət olmalıdır.

Konfrans panel formatında davam edib.

Regional konfransın “Ənənəvi İslam: tarixi təcrübə və müasir reallıqlar” mövzusuna həsr edilən panel sessiyasına Mənəvi Dəyərlərin Təbliği Fondunun icraçı direktorunun müavini Ceyhun Əliyev moderatorluq edib. Azərbaycan İlahiyyat İnstitutunun (Aİİ) rektoru Aqil Şirinov, Milli Məclisin İctimai birliklər və dini qurumlar komitəsinin sədr müavini Sahib Alıyev və Dini Qurumlarla İş üzrə Dövlət Komitəsinin sədr müavini Gündüz İsmayılov mövzu ilə bağlı fikirlərini bölüşüblər.

Bakı İlahiyyat Kollecinin direktoru Mehman İsmayılovun moderatorluğu ilə keçirilən “Milli-mənəvi dəyərlərin təbliğində din xadimlərinin məsuliyyəti və rolu” adlı paneldə İslam dininin əsl mahiyyətinin təbliği və təşviqində, yad dini cərəyanların və zərərli təsirlərin qarşısının alınmasında din xadimlərinin fəallığının artırılması barədə fikir mübadiləsi aparılıb. Paneldə Aİİ-nin müəllimi, ilahiyyat üzrə fəlsəfə doktoru, dosent Aslan Həbibov, Aİİ-nin müəllimi, ilahiyyat üzrə fəlsəfə doktoru Kövsər Tağıyev və Qafqaz Müsəlmanları İdarəsinin bölgə qazısı Əli Məmmədov çıxış ediblər.

Sonra mövzu ilə bağlı fikir mübadiləsi aparılıb, suallar cavablandırılıb.

Tədbir çərçivəsində “Həmişə bizimləsiniz!” filmi də nümayiş etdirilib.