Misir hökuməti növbəti COP27 İqlim Dəyişikliyi Konfransının Şarm əl-Şeyxdə keçirilməsini təklif edib
Qahirə, 3 noyabr, AZƏRTAC
Misir hökuməti 2022-ci ildə “COP27...Birləşmiş Afrika dayanıqlı inkişafa doğru” mövzusunda keçiriləcək BMT-nin COP27 İqlim Dəyişikliyi Konfransının Şarm əl-Şeyx kurort şəhərində keçirilməsi təklifi ilə çıxış edib.
AZƏRTAC xəbər verir ki, Misirin Nazirlər Kabineti BMT-nin gələn ilin əvvəlində keçiriləcək sessiyasında bu ölkənin namizədliyini rəsmi şəkildə təqdim edəcək. Rəsmi Qahirə Afrika qitəsi ölkələri adından bu təklifi Qlazqo şəhərində keçirilən GOP26 konfransında da irəli sürüb. Həmin tədbirdə çıxış edən Misir Prezidenti Əbdülfəttah əl-Sisi öz ölkəsində “yaşıl iqtisadiyyat” sahəsində həyata keçirilən tədbirlərdən bəhs etməklə yanaşı, ümumilikdə Afrikada mövcud olan problemlərdən də danışıb. O qeyd edib ki, iqlim dəyişikliyi ilə əlaqədar tədbirləri həyata keçirmək üçün inkişaf etməkdə olan və yoxsul ölkələrə maddi dəstək göstərilməlidir.
Artıq Misirin Ekologiya Nazirliyi Şarm əl-Şeyxdə keçirilməsi təklif edilən konfransla bağlı buklet də nəşr etdirib. Qeyd olunub ki, bu kurort şəhəri 2018-ci ildə COP14 çərçivəsində Biomüxtəliflik Konfransına və UNESCO-nun bir çox tədbirlərinə ev sahibliyi edib.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
