Misir Prezidenti Qahirədə baş vermiş partlayışı terror aktı adlandırıb
Qahirə, 5 avqust, AZƏRTAC
Misir Prezidenti Əbdülfəttah əs-Sisi ötən gecə Qahirədə Onkologiya Xəstəxanasının yaxınlığında baş vermiş ağır yol qəzası nəticəsində baş vermiş güclü partlayışı terror aktı adlandırıb.
AZƏRTAC xəbər verir ki, bu barədə ölkə başçısı özünün “Twitter” səhifəsində yazıb: “Mən Misir xalqına və terror hücumu nəticəsində həlak olmuş insanların ailələrinə başsağlığı verirəm. Misir bütün qüvvəsi ilə terrorizmə qarşı onun kökü kəsilənə qədər mübarizə aparacaq”.
İlkin araşdırmalar göstərib ki, qarşı zolağa çıxan və üzbəüz gələn maşınlara çırpılan avtomobil partlayıcı maddələrlə dolu olub. Qeyd olunur ki, bu terror aktının arxasında “Müsəlman qardaşları” hərəkatının hərbi qolu sayılan “Hasm” qruplaşması dayanır. Avtomobil bir neçə ay bundan öncə qaçırılıb və axtarışda olub.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
