MİSİRDƏ 28 MAY - RESPUBLİKA GÜNÜ QEYD EDİLMİŞDİR
Səfirliyin təşəbbüsü ilə “Azərbaycana xoş gəlmişsiniz” adlı broşür ərəb dilində və Afroasiya Yazıçılar İttifaqının geniş oxucu kütləsinə malik “Lotus” jurnalının Azərbaycana həsr olunmuş xüsusi buraxılışı çap edilmişdir. Nüfuzlu “Əl-Cümhuriyyə” qəzetində ölkəmizin siyasi, sosial-iqtisadi inkişafı, habelə Ermənistanın Azərbaycana hərbi təcavüzü ilə bağlı bir səhifəlik məqalə çap edilmişdir. Bundan əlavə, Misir televiziyasının II kanalı Azərbaycan barədə proqram yayımlamışdır.
Mayın 28-də Misir Prezidenti Məhəmməd Hüsni Mübarəkin xüsusi nümayəndəsi səfirliyimizə gələrək, səfir Faiq Bağırovdan Misirin dövlət başçısının təbriklərini Prezident İlham Əliyevə çatdırmağı xahiş etmişdir.
Qahirənin “Four Seasons” mehmanxanasında 28 May – Respublika günü və Azərbaycan neftinin Ceyhan limanına çatması ilə əlaqədar keçirilən tədbirdə səfir F.Bağırov Prezident İlham Əliyevin 28 May - Respublika günü münasibətilə “Gülüstan” sarayında keçirilən rəsmi qəbulda söylədiyi nitqi barədə məlumat vermişdir.
Son vaxtlar daha da inkişaf edən Azərbaycan-Misir əlaqələrinin perspektivlərinə toxunan səfir, Azərbaycanın təşəbbüsü və iştirakı ilə həyata keçirilən regional layihələr barədə danışmışdır.
Misirin hökumət orqanlarının, diplomatik korpusun, ictimaiyyətin və mətbuatın təmsilçilərinin qatıldığı tədbirdə Azərbaycan haqqında film nümayiş olunmuş, broşürlər və “Əl-Cümhuriyyə” qəzetinin ölkəmizlə bağlı məqaləsi qonaqlara təqdim edilmişdir.
Bölmənin digər xəbərləri
