MİSİRİN DİN XADİMLƏRİ İLƏ GÖRÜŞLƏR
Misirdə səfərdə olan Dini Qurumlarla İş üzrə Dövlət Komitəsinin sədri Rafiq Əliyev bir sıra görüşlər keçirmişdir. O, MƏR-in Vəqflər nazirinin müavini, Dini Tədqiqatlar Liqasının baş katibi, təhsil nazirinin müavini, Əl-Əzhar Universitetinin rektoru ilə söhbətlərdə Azərbaycanda aparılan islahatlardan, rəhbərlik etdiyi dini qurum yaradıldıqdan sonra görülən tədbirlərdən danışmışdır.
Din-dövlət münasibətlərində Misirin təcrübəsi və bundan istifadə yolları da müzakirə edilmişdir. Misirli həmkarlar dinin insanların və dövlətin həyatındakı rolunu yüksək qiymətləndirməklə yanaşı, dinin siyasətə qarışmasının yolverilməzliyini bildirmişlər. Dini təbliğ edən adamların yüksək dini və dünyəvi biliklə yanaşı, yüksək mədəniyyət sahibi olmasının zəruriliyi vurğulanmışdır. Bu sahədə təcrübə mübadiləsinə ehtiyac olduğu və gələcəkdə bunun təşkilinin mümkünlüyü qeyd edilmişdir.
Görüşlər zamanı Əl-Əzhar Universitetində təhsil alan azərbaycanlı tələbələr üçün yaradılmış şəraitdən söz açılmış və ümumiyyətlə, din sahəsində əlaqələri tənzimləmək və dövlət nəzarətinə almaqdan ötrü anlaşma protokolunun imzalanmasına ehtiyac olduğu vurğulanmışdır.
Rafiq Əliyev Misir Ərəb Respublikasının baş müftisi Əhməd Tayyib ilə görüşmüş və geniş fikir mübadiləsi aparmışdır.
Bölmənin digər xəbərləri
