Misirin “Əl-Cəmahir” qəzetində Azərbaycan səfirinin məqaləsi dərc edilmişdir
Qahirə, 3 iyul (AZƏRTAC). Azərbaycanın Misirdəki səfiri Şahin Abdullayevin bu ölkənin “Əl-Cəmahir” qəzetində məqaləsi dərc edilmişdir.
Ş.Abdullayev məqalədə Azərbaycanın neft, qaz ixrac etməklə yanaşı, aqrar sahədə də inkişaf etdiyini və ölkənin kənd təsərrüfatı məhsullarının xaricə ixrac olunduğunu bildirmişdir. O, Azərbaycanın hələ qədim zamanlarda tarixi İpək Yolu ilə ticarət mallarını dünya bazarlarına çıxarması barədə məlumat vermişdir. Səfir Azərbaycan, Gürcüstan və Türkiyəni birləşdirən Bakı-Tbilisi-Qars dəmir yolu xəttinin tikintisinin cari ilin sonunda başa çatacağını, bununla da Asiya və Avropa arasında bir körpü rolunu oynayacağını qeyd etmiş, gələcəkdə bu dəmir yolu xəttinin Körfəz ərəb ölkələri ilə birləşdirilməsinə dair fikirlərin mövcud olduğunu diqqətə çatdırmışdır.
Ş.Abdullayev 1988-ci ildən başlayan Ermənistan-Azərbaycan, Dağlıq Qarabağ münaqişəsi barədə məlumat verərək, Azərbaycan torpaqlarının 20 faizinin Ermənistan silahlı qüvvələri tərəfindən işğal edildiyini, bununla bağlı BMT Təhlükəsizlik Şurasının 1993-cü ildə dörd qətnamə qəbul etdiyini, həmin qətnamələrdə Ermənistan silahlı qüvvələrinin işğal olunmuş Azərbaycan torpaqlarından dərhal və qeyri-şərtsiz çıxarılmasının tələb olunduğunu vurğulamışdır. Səfir ATƏT-in Minsk qrupunun Dağlıq Qarabağ münaqişəsinin sülh yolu ilə həlli istiqamətində fəaliyyətinə toxunaraq 20 ildən çox davam edən danışıqların hələ heç bir nəticə vermədiyini, BMT-nin qətnamələrinin Ermənistan tərəfindən yerinə yetirilmədiyini diqqətə çatdırmışdır.
Diplomat Azərbaycan neftinin və qazının bir neçə boru xətti ilə Gürcüstan və Türkiyə vasitəsilə dünya bazarlarına çıxarıldığını, Azərbaycanın qısa zamanda böyük iqtisadi nailiyyətlər əldə etməsinin ölkədəki əmin-amanlıq və sabitliklə, həmçinin düzgün idarəçilik siyasəti ilə əlaqədar olduğunu bildirmişdir.
Ş.Abdullayev məqalədə bildirir ki, 2003-cü ildə Azərbaycanda yoxsulluq həddi 49 faiz olduğu halda bu gün 5 faizdən də aşağıdır. Ölkədə işsizliyin səviyyəsi 5 faizə düşmüş, ötən on ildə 1 milyon 200 min yeni iş yeri açılmış, 2014-cü il “Sənaye ili” elan edilmişdir.
Misir-Azərbaycan münasibətlərindən danışan səfir əlaqələrin yaxşı səviyyədə olduğunu qeyd etmişdir. O, Misirin Azərbaycanın müstəqilliyini tanıyan ilk ölkələrdən biri olduğunu, iki ölkə arasında yüksək səviyyəli qarşılıqlı səfərlərin təşkil edildiyini bildirmişdir. Misir və Azərbaycan arasında müştərək iqtisadi komissiyanın fəaliyyəti haqqında məlumat verən diplomat qurumun növbəti iclasının yaxın vaxtlarda keçiriləcəyini diqqətə çatdırmışdır. Misirin Azərbaycan üçün Afrikaya, Ərəb və İslam dünyasına bir giriş qapısı olduğunu yazan Ş.Abdullayev vurğulamışdır ki, iki ölkə arasında ticarət sahəsində əməkdaşlıq yaxşı səviyyədədir.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
