Moldovada Azərbaycan bazar günü məktəbində ilk dərs COP29-a həsr olunub
Kişineu, 23 sentyabr, AZƏRTAC
Yay tətilindən sonra Moldova Azərbaycanlıları Konqresinin (MAK) bazar günü məktəbində dərslər bərpa olunub.
AZƏRTAC xəbər verir ki, Kişineuda yerləşən məktəbdə ilk zəng çalınıb və çıxışlar edilib.
Bazar günü məktəbi Moldova Azərbaycanlıları Konqresinin təşəbbüsüdür və Azərbaycanın Diasporla İş üzrə Dövlət Komitəsi tərəfindən fəal dəstəklənir. Azərbaycan icmasının 50-dən çox üzvünün uşaqları bu məktəbdə oxuyur, burada ana dilini öyrənir, xalqımızın mədəniyyəti, bədii ədəbiyyatı və tarixi ilə tanış olurlar. Dərslər İon Kryanqe adına Moldova Dövlət Pedaqoji Universitetində keçirilir.
Rəsmi tədbirdə Azərbaycanın Moldovadakı səfiri Ülvi Baxşəliyev, Moldova parlamentinin deputatı Vitali Jakot, Təhsil və Tədqiqatlar Nazirliyi baş katibinin müavini Lyudmila Pavlova, universitetin tədris işləri üzrə prorektoru Luçiya Çepraqa, rumın dili üzrə metodiki dərsliklərin müəllifi Aleksey Aksan, həmçinin Azərbaycan diasporunun nümayəndələri iştirak ediblər.
Tədbirdə çıxış edən MAK-ın sədri Elçin Bayramov qeyd edib ki, bazar günü məktəbinin şagirdləri artıq üçüncü ildir bu divarlar arasında dərs oxumaq, dostluq etmək və yenidən ünsiyyət qurmaq üçün görüşürlər: “Uşaqlıqdan onlarda Azərbaycana sevgi hissləri aşılayırıq. Prezident İlham Əliyev Dünya Azərbaycanlılarının V Qurultayında gələcək nəsil azərbaycanlılarının öz mədəniyyətinə bağlı olması, öz ana dilində danışması üçün bazar günü məktəblərinin inkişafı naminə diaspor təşkilatlarına xeyir-dua verib. Ona görə də uşaqların Azərbaycanın tarixini, dilini, mədəniyyətini öyrənərək böyüməsini təmin etmək bizim borcumuzdur. Şadam ki, ardıcıl üçüncü ildir ki, buz bunu yüksək səviyyədə həyata keçiririk”.
Azərbaycanın Moldovadakı səfiri Ülvi Baxşəliyev, Moldova parlamentinin deputatı Vitali Jakot, Təhsil və Tədqiqatlar Nazirliyi baş katibinin müavini Lyudmila Pavlova, eləcə də Pedaqoji Universitetin tədris işləri üzrə prorektoru Luçiya Çepraqa şagirdlərə uğurlar arzulayıblar.
Sonra ilk zəng çalınıb və birinci dərs başlayıb. Məktəbin ilk günündə uşaqlar öz tarixi vətənləri ilə həmrəylik nümayiş etdiriblər. Belə ki, Azərbaycanın hər bir məktəbində olduğu kimi, MAK bazar günü məktəbində də ilk dərs noyabrın 11-dən 22-dək Bakıda keçiriləcək BMT-nin İqlim Dəyişmələri üzrə Çərçivə Konvensiyası Tərəfləri Konfransının 29-cu sessiyasına (COP29) həsr olunub.
MAK bazar günü məktəbinin müəllimi Səidə Səfərova şagirdlərə qlobal iqlim dəyişikliyi problemi, iqlim xaosunun qarşısının alınması üçün bəşəriyyətin mümkün səyləri və qarşıdan gələn konfrans haqqında ətraflı məlumat verib.
Ənənəyə uyğun olaraq, ilk dərs günü Azərbaycan şirniyyatları və çay süfrəsi ilə başa çatıb.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
