Moldovada Xocalı soyqırımı qurbanlarının xatirəsi yad edilib
Kişineu, 28 fevral, AZƏRTAC
Moldovanın Millətlərarası Bürosunun Holokost Muzeyində Azərbaycanın bu ölkədəki səfirliyinin və Moldova Azərbaycan Konqresinin təşkilatçılığı ilə Xocalı soyqırımına həsr olunmuş anım tədbiri keçirilib.
Səfirlikdən AZƏRTAC-a bildiriblər ki, muzeyin foyesində Xocalı faciəsini əks etdirən fotosərgi təşkil olunub.
Tədbirdə Moldovada akkreditə olunmuş diplomatik korpusun nümayəndələri, o cümlədən Belarus, Türkiyə, Qətər səfirləri, ictimai xadimlər, yerli jurnalistlər, azərbaycanlı və türk tələbələr, o cümlədən həmvətənlərimiz iştirak ediblər.
“Xocalıya ədalət!” beynəlxalq kampaniyası çərçivəsində baş tutan tədbirin iştirakçıları əvvəlcə Xocalı soyqırımını əks etdirən kitab və fotolardan ibarət sərgi ilə tanış olublar.
Xocalı soyqırımı və Azərbaycanın müstəqilliyi və suverenliyi uğrunda həyatlarını qurban vermiş bütün şəhidlərin xatirəsi bir dəqiqəlik sükutla yad edilib.
Səfir Qüdsi Osmanov çıxış edərək 1992-ci il fevralın 25-dən 26-na keçən gecə bütün dünyanı öz dəhşəti ilə sarsıdan Xocalı faciəsindən 26 il keçdiyini qeyd edib, həmin günün Azərbaycan tarixinin ən kədərli səhifələrindən biri olduğunu deyib. Diplomat Azərbaycanın dinc əhalisinə qarşı törədilən bu qətliamın təşkilatçılarının bu gün Ermənistanın rəhbərliyində olduğunu diqqətə çatdırıb. Q.Osmanov bildirib ki, belə dəhşətli hadisələrin dünyanın heç bir yerində bir daha təkrarlanmaması üçün erməni faşizmini və vandalizmini ifşa edən Xocalı soyqırımının beynəlxalq aləmdə tanıdılması və Azərbaycanın haqq səsinin bütün dünyada yayılması Azərbaycanın xarici siyasətinin əsas istiqamətlərindən biri kimi müəyyənləşdirilib.
O, Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci ildə başlanmış “Xocalıya ədalət!” beynəlxalq kampaniyasının dünya ictimaiyyətinə bu faciə barədə həqiqətlərin çatdırılması istiqamətində böyük rol oynadığını bildirib.
Dağlıq Qarabağ münaqişəsinin həllinə toxunan səfir problemin beynəlxalq hüququn norma və prinsiplərinə əsaslanaraq ölkəmizin mənafeyinə uyğun şəkildə həll olunması istiqamətində Azərbaycan Prezidenti İlham Əliyevin rəhbərliyi ilə əldə olunan nailiyyətlərdən söz açıb.
Moldovanın Millətlərarası Bürosunun rəhbəri Oleq Babeko çıxışında Xocalı faciəsini törədən cinayətkarları pisləyib, soyqırımı barədə dünya ölkələrinin məlumatlandırılmasının vacib olduğunu bildirib. Tədbirdə bir çox millətlərin nümayəndələrinin iştirakını qeyd edən natiq ağır gündə Moldova xalqının Azərbaycan xalqının yanında olduğunu vurğulayıb.
Moldova Azərbaycan Konqresinin sədri Vüqar Novruzov Xocalı faciəsinin Azərbaycan tarixində ən dəhşətli səhifələrindən biri olduğunu söyləyərək, faciə qurbanlarını daim Azərbaycan xalqının qəlbində yaşayacaqlarını deyib. “Uydurma erməni soyqırımı barədə faktlar axtaran şəxslər, ilk öncə, Azərbaycan tarixinə müraciət edib, Xocalı faciəsini araşdırmalıdırlar”, - deyə Vüqar Novruzov bildirib.
Moldova Parlamentinin deputatı, parlamentin xarici əlaqələr və Avropaya inteqrasiya komitəsinin katibi Sergey Stati çıxışında Azərbaycan xalqına başsağlığı verib, Xocalı soyqırımının Azərbaycan xalqının şüurunda fundamental yer tutduğunu bildirib. Faciənin ağır nəticələrindən danışan millət vəkili 1992-ci ilin Moldova tarixi üçün də ağır və iztirablı olduğunu vurğulayaraq deyib: “Bu hadisələrə doğru qiymət vermək üçün imkanları qiymətləndirmək lazımdır ki, belə hadisələr gələcəkdə təkrarlanmasın”.
Türkiyə səfirinin vəzifələrini müvəqqəti icra edən İskender Okyay Xocalı faciəsinin əsrin digər dəhşətli hadisələri ilə bir sırada durduğunu bildirib. O, bu hadisənin insanlığın utancı, xəstə milliyyətçiliyin və təcavüzün təzahürü adlandırıb. Faciənin Türkiyənin qardaş dövlətinə qarşı törədildiyini qeyd edən İ.Okyay erməni cəlladlarının hələ XX əsrin əvvəllərində oxşar hadisələrin türk xalqının başına gətirmək və sonra uydurma soyqırımı bəsləmək cəhdlərini xatırladıb.
Qafqaz, Gürcü və Buxar yəhudilər icmasının sədri Aleksandr Xanukayev Xocalı faciəsinin heç kəsi laqeyd qoymadığını söyləyib. Yəhudi xalqının Azərbaycan xalqının qəm və kədərini bölüşdüyünü bildirib.
Moldova Respublikasının Effektiv Siyasət İnstitutunun direktor müavini, tarix elmləri doktoru Ruslan Şevçenko erməni işğalçıları tərəfindən törədilən Xocalı qətliamının Azərbaycan xalqının və dövlətinin iradəsini qırmaq üçün həyata keçirildiyini, lakin buna nail olmadıqlarını söyləyib.
Moldovada Ukrayna icmasının rəhbəri Nikolay Oleynik dünya ölkələri tərəfindən bu qətliama beynəlxalq səviyyədə ədalətli hüquqi-siyasi qiymətin verilməsinin və bu cinayətin təşkilatçılarının cəzalandırılmasının vacibliyini qeyd edib. Bildirib ki, bu gün hərtərəfli inkişaf edən Azərbaycan Xocalı qurbanlarının xatirəsinə ən layiqli abidədir.
Moldovada türk biznesmenləri assosiasiyasının sədri İslam Səyid Xocalıdakı kimi qırğınların dünyanın heç bir yerində bir daha baş verməməsi üçün Xocalı soyqırımının dünyada tanınmasının və erməni cinayətkarlarının məsuliyyətə cəlb edilməsinin vacibliyini vurğulayıb.
Moldovada Bakı Multikulturalizm Mərkəzinin rəhbəri Aureliya Qriqoriu artıq “Xocalıya ədalət!” şüarlarının dünyanın bütün tribunalarından səsləndiyini, Moldovanın Xocalı soyqırımı ilə bağlı Azərbaycan xalqının ağrısını bölüşdüyünü deyib.
Tədbirdə Xocalı faciəsindən bəhs edən və tamaşaçılara bu dəhşətlərin canlı şahidləri olmuş insanların danışdıqlarını çatdıran “Zülmətdən qaçış” sənədli filmi nümayiş olunub. Həmçinin iştirakçılara Xocalı soyqırımı ilə bağlı bülletenlər paylanılıb.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
