İTAR-TASS-ın Baş direktoru Vitali İqnatenko sərgini açaraq, Azərbaycanın idman nailiyyətləri və idmançılarımızın uğurları ilə tanış olmaq imkanına görə AZƏRTAC agentliyinin rəhbərliyinə və bütün kollektivinə təşəkkürünü bildirmişdir. O vurğulamışdır ki, AZƏRTAC agentliyi fotomüxbirlərinin yaratdıqları bu sərgidə Azərbaycanın idman həyatının ən mühüm məqamları təcəssümünü tapmışdır. Bu sərgi ilə tanış olarkən azad Azərbaycanda ümumən həyatın necə inkişaf etməsi barədə fikir söyləmək olar. O demişdir: “Bu gün dünyanın idman xəritəsində Azərbaycan çox layiqincə təmsil olunmuşdur və onun idman həyatı böyük yüksəlişdədir. Diqqətəlayiq haldır ki, Azərbaycanın ictimai həyatının bir qolu olan idman sahəsində və ümumən, Azərbaycanın həyatında proseslər Rusiya ilə sıx qarşılıqlı əlaqədə gedir. Bizim Azərbaycanla çox səmərəli və daimi əlaqələrimiz var. Bu əlaqələr gələcəkdə də inkişaf edəcəkdir”.

Açılış mərasimində iştirak etmək üçün Moskvaya gələn gənclər və idman naziri Azad Rəhimov AZƏRTAC-ın simasında bu gözəl sərginin təşkilatçıları tərəfindən görülən işi yüksək qiymətləndirmiş, habelə belə maraqlı sərginin keçirilməsinə kömək göstərdiyinə görə İTAR-TASS agentliyinin rəhbərliyinə dərin təşəkkürünü bildirmişdir. O vurğulamışdır ki, bu sərgi sayəsində Rusiya ictimaiyyəti ölkəmizin fotoşəkillərdə əksini tapan idman nailiyyətləri ilə tanış ola biləcəkdir. Nazir demişdir: “AZƏRTAC-ın sərgisinin İTAR-TASS-ın köməyi ilə təşkili indi Azərbaycan ilə Rusiya arasında, ölkələrimizin xalqları arasında həyata keçirilən əməkdaşlığın böyük proqramının bir hissəsidir. Ölkələrimizi dərin tarixi köklər və dostluq telləri bağlayır, xalqlarımız isə bu münasibətlərin daha da inkişaf etdirilməsinə, bu dostluğun daha da möhkəmlənməsinə tərəfdardırlar. Bugünkü hadisə də buna parlaq misaldır”.

Azad Rəhimov mərasimə toplaşanlara ölkəmizin idman sahəsindəki son nailiyyətləri barədə məlumat vermişdir. O bildirmişdir ki, Azərbaycanda idmanın inkişafına böyük diqqət yetirilir, idman kompleksləri tikilir. İdman sahəsində uğurlarımız sürətlə artır, Sidneydə və Afinada qazanılan medallar göstərir ki, Azərbaycan idmanının inkişafı düzgün yoldadır. Bütün bunlar ümummilli lider Heydər Əliyevin vaxtilə idmana göstərdiyi qayğının və himayənin bəhrəsidir. A.Rəhimov Azərbaycan Prezidenti, Milli Olimpiya Komitəsinin prezidenti İlham Əliyevin “bütün bunlar cəmiyyətimizin, idman ictimaiyyətinin milli idmanımızın inkişafına çəkdiyi zəhmətin, verdiyi əhəmiyyətin nəticəsidir” sözlərini misal gətirmişdir.

Rusiya Federal Bədən Tərbiyəsi və İdman Agentliyinin rəhbəri Vyaçeslav Fetisov İTAR-TASS-da idman fotosərgisinin keçirilməsindən dərin məmnunluğunu ifadə etmişdir. O demişdir: “Azərbaycan sərgisinin açılış mərasimində iştirak etmək, ölkələrimiz üçün əlamətdar şəkillərlə tanış olmaq çox xoşdur. Əvvəllər bütün idman nailiyyətləri bir ölkəyə məxsus idi. İndi biz müxtəlif ölkələrdə yaşayırıq, buna baxmayaraq, çox yaxşı qarşılıqlı münasibətlərimiz var. Təkcə beynəlxalq səviyyədə deyil, həm də idman sahəsində, idmanın inkişafına böyük əhəmiyyət verilməsi və həm Rusiya Federasiyasının, həm də Azərbaycan Respublikasının həyata keçirdiyi dövlət siyasəti şəraitində qarşılıqlı əlaqələrin olması çox xoşdur. Azərbaycanda Prezident İlham Əliyevin Milli Olimpiya Komitəsinin prezidenti olması çox mühüm faktdır. Bu, Azərbaycanda idmanın inkişafına, bu sahədə yüksək nailiyyətlər qazanılması üçün şərait yaradılmasına necə böyük əhəmiyyət verilməsinə sübutdur”. V.Fetisov daha sonra demişdir ki, bizim təcrübə mübadiləsi aparmaq və dostlarımızla sıx qarşılıqlı fəaliyyət göstərmək üçün çoxlu imkanımız var. Mən bu yaxınlarda Azərbaycanda oldum və gördüm ki, bu ölkədə idmançılar üçün hər bir şərait yaradılır. Əminəm ki, onlar beynəlxalq yarışlarda qələbələr qazanacaqlar. Belə sərgilər nə qədər çox təşkil edilərsə, bizim yüksək dəyərləndirdiyimiz dostluğumuz daha da möhkəm olar. Bu gün idmanın bütün planetdə insanları birləşdirən az-az amillərdən olduğunu anlamağımız çox vacibdir və biz birgə qələbələrə ümid bəsləyirik.

Beynəlxalq Olimpiya Komitəsinin birinci vitse-prezidenti Vitali Smirnov çıxışında vurğulamışdır ki, bu sərgi Moskva ictimaiyyətinin təkcə idman həyatında deyil, ümumən, bütün həyatında çox mühüm hadisədir. Sərgi hər hansı cəmiyyətin həyatının ən cəlbedici sahələrindən birinə - idmana həsr olunmuşdur. Azərbaycanı və Rusiyanı bu sahədə çox yaxın münasibətlər birləşdirir. Baydarka və kanoelərdə avarçəkmə üzrə sovet idmançılarının qələbələrinin bünövrəsi Azərbaycanda qoyulurdu, digər idmançılar da burada məşq edirdilər. Azərbaycan idmançıları Sovet İttifaqının yığma komandaları tərkibində, sonralar isə müstəqil Azərbaycanda bir sıra növlərdə yüksək nəticələrə nail olmuşlar. Deyə bilərik ki, bu gün Azərbaycan güləş, ağır atletika, voleybol, taekvondo, boks kimi idman növlərində beynəlxalq tədbirlərin keçirilməsinin yeni, mükəmməl səviyyəsinə çıxmışdır. Ölkədə idmanın beş olimpiya növü üzrə seçmə yarışlar keçirilmişdir. Bu yaxınlarda bədii gimnastika üzrə dünya çempionatı çox yüksək, mütəşəkkil səviyyədə təşkil olunmuşdur. Azərbaycan Gimnastika Federasiyasının prezidenti, ölkə Prezidentinin xanımı Mehriban Əliyeva bu gözəl idman növünün inkişafı üçün çox işlər görür.

V.Smirnov daha sonra demişdir: “Əlbəttə, mən böyük insanı - Azərbaycan xalqının dahi oğlu Prezident Heydər Əliyeviç Əliyevi xatırlamaq istərdim. Mən onu şəxsən çox yaxşı tanıyırdım, çünki o, SSRİ Nazirlər Soveti Sədrinin birinci müavini işləyərkən ölkədə idmana kuratorluq edirdi. İdmançılarımızın beynəlxalq meydanda bugünkü qələbələri üçün çox ciddi əsaslar məhz onda qoyulmuşdur. İndiki Prezident İlham Əliyevin bu ənənələri davam etdirməsi və MOK-un başçısı vəzifəsində qalması çox rəmzidir. İki il bundan əvvəl mənə böyük bir şərəf qismət oldu – ona Beynəlxalq Olimpiya Komitəsinin prezidenti adından Olimpiya ordeni təqdim etdim və əmin oldum ki, əsası Heydər Əliyev tərəfindən qoyulmuş bütün ənənələr, o cümlədən Azərbaycan rayonlarında iri idman mərkəzləri yaradılması ənənəsi davam edir. Biz həndbol üçün gözəl idman sarayı açdıq, istifadəyə verilmiş yeni idman qurğularını gördük. Zənnimcə, Azərbaycan idmançıları və bədən tərbiyəçilərinin çox yaxşı gələcəyi var. Odur ki, Rusiya idmançıları Azərbaycan idmançıları ilə nə qədər çox dostluq etsələr, bir-birini dəstəkləsələr, təcrübə mübadiləsi aparsalar, Azərbaycanın gözəl iqlim şəraitindən bəhrələnsələr, bizim təhsil ocaqlarımızın təcrübəsini həmkarlarına öyrətsələr, onda hər iki dövlətin idmanda nailiyyətləri bir o qədər çox olacaqdır. Bundan isə xalqlarımız və gənclərimiz ancaq qazanacaqlar”.

AZƏRTAC-ın baş redaktoru Elmira Əliyeva Azərbaycan Dövlət Teleqraf Agentliyinin baş direktoru Aslan Aslanovun adından sərgi iştirakçılarını səmimiyyətlə salamlayaraq, fotosərginin təşkilinə kömək göstərənlərin hamısına ürəkdən təşəkkür etmiş, sərginin keçirilməsində əməkdaşlığa görə İTAR-TASS-ın baş direktoru V.İqnatenkonun, onun birinci müavini M.Qusmanın simasında agentliyin rəhbərliyinə, habelə Moskvada fotosərgi keçirmək təşəbbüsünü dəstəklədiyinə görə ÜAK-ın Moskva regional şöbəsinin sədri İlqar Hacıyevə və ÜAK-ın İqtisadi İnkişaf Fondunun rəhbərliyinə dərin minnətdarlığını bildirmişdir. E.Əliyeva xatırlatmışdır ki, Azərbaycan bütün digər sahələrdə olduğu kimi, idmanda da sanballı nəticələr əldə etmişdir. Azərbaycan idmançıları təkcə 2005-ci ildə müxtəlif səviyyəli yarışlarda 213 medal qazanmışlar. İdmanın yenicə yüksək sürətlə inkişafa başladığı ölkəmiz üçün bu, heç də kiçik nəticə deyildir. Ümidvarıq ki, ulu öndər Heydər Əliyevin siyasətinin Azərbaycan Prezidenti İlham Əliyev tərəfindən davam etdirilməsi bizə daha böyük uğurlar gətirəcəkdir.

Sərgidə AZƏRTAC-ın fotomüxbiri İlqar Cəfərovun və onun idman mövzusu üzrə işləyən həmkarlarının 100-dək işi nümayiş etdirilir. Ekspozisiyada idmançıların həyatından nadir məqamlar və müxtəlif idman yarışlarından, Olimpiya və Paralimpiya oyunlarından, Bakıda keçirilmiş bədii gimnastika üzrə dünya çempionatından və digər idman tədbirlərindən maraqlı anlar əks olunmuşdur.