“Müasir gənclik: milli dəyərlər, yeni düşüncə və gələcəyə baxış” mövzusunda tədbir keçirilib
Bakı, 16 iyul, AZƏRTAC
İyulun 16-da “Konstitusiya və Suverenlik İli” çərçivəsində Yeni Azərbaycan Partiyası (YAP) Mərkəzi Aparatının və YAP İsmayıllı rayon təşkilatının birgə təşəbbüsü ilə “Müasir gənclik: milli dəyərlər, yeni düşüncə və gələcəyə baxış” mövzusunda tədbir keçirilib.
YAP-dan AZƏRTAC-a bildirilib ki, tədbir iştirakçıları əvvəlcə İsmayıllı şəhərində Ulu Öndər Heydər Əliyevin abidəsini ziyarət edib, önünə gül dəstələri düzüblər.
Tədbirdə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Çıxış edən YAP İsmayıllı rayon təşkilatının sədri Zaur Muradov gənclərin hər bir cəmiyyətin aparıcı qüvvəsi olduğunu deyib, onların əsas vəzifəsinin müstəqil dövləti və milli dəyərləri qorumaq olduğunu bildirib.
Tədbirin moderatoru, YAP Mərkəzi Aparatının Gender siyasəti və gənclərlə iş şöbəsinin müdiri Zəkiyyə Musayeva Prezident İlham Əliyev tərəfindən 2025-ci ilin “Konstitusiya və Suverenlik İli” elan olunmasının əhəmiyyətindən bəhs edib. Bildirib ki, dövlət gənclər siyasətinin əsası Ulu Öndər Heydər Əliyev tərəfindən qoyulub və Prezident İlham Əliyev bu siyasəti uğurla davam etdirir.
YAP Veteranlar Şurasının üzvü, Milli Məclisin Aqrar siyasət komitəsinin sədri Tahir Rzayev bildirib ki, Prezident İlham Əliyevin uğurlu gənclər siyasəti gənc nəslin ictimai-siyasi həyatdakı rolunun artmasına, ölkənin aparıcı qüvvəsinə çevrilməsinə şərait yaradıb. Dövlətin gənclərə dəstək və diqqəti Azərbaycan gəncliyində özünə, öz gücünə, istedadına inam hissini artırıb.
Milli Məclisin deputatı Səbinə Xasayeva çıxışında Azərbaycanın 44 günlük Vətən müharibəsində qazandığı Qələbənin milli kimliyimizin və dövlətçilik dəyərlərinin təzahürü olduğunu bildirib. O, gənclərin həm döyüş meydanında, həm də arxa cəbhədə fəal iştirak edərək Azərbaycanın haqqını beynəlxalq ictimaiyyətə çatdırdıqlarını vurğulayıb.
İsmayıllı rayonu üzrə təhsil sektorunun müdiri Rəşid Məmmədli və rayonun Dövlət Peşə Təhsil Mərkəzinin direktor müavini Nərmin Osmanlı çıxış edərək ölkədə aparılan məqsədyönlü gənclər siyasətindən və bu istiqamətdə atılan addımlardan, qarşıda dayanan vacib hədəflərdən danışıblar.
İnteraktiv formada davam edən tədbirdə iştirakçıların sualları cavablandırılıb.
Sonra partiya sıralarına yeni qəbul olunan şəxslərə üzvlük vəsiqələri təqdim edilib.
Tədbir Yeni Azərbaycan Partiyasının Himninin səsləndirilməsi ilə başa çatıb.
Bölmənin digər xəbərləri
