Hörmətli generallar və zabitlər!

Məzunlar və kursantlar!

Əziz valideynlər, müharibə veteranları, qonaqlar, xanımlar və cənablar!

Sizi Silahlı Qüvvələrin təhsil müəssisələri məzunlarının növbəti buraxılışına həsr edilmiş mərasimdə salamlayır və təbrik edirəm.

Bu buraxılışın xüsusiyyəti ondan ibarətdir ki, biz ilk dəfə üç ali hərbi məktəbimizlə yanaşı, Silahlı Qüvvələrin Təlim-Tədris Mərkəzini və Silahlı Qüvvələrin Hərbi Akademiyasını bitirmiş məzunların buraxılışını eyni vaxtda keçiririk.

Bu buraxılışın ən əlamətdar hadisəsi isə Azərbaycan Ali Hərbi Məktəbində ümummilli liderimiz, Silahlı Qüvvələrin əbədi Ali baş komandanı Heydər Əliyevin monumental abidəsinin açılışı olmuşdur.

Biz Prezidentimiz, Silahlı Qüvvələrin Ali baş komandanı İlham Əliyevə respublikamızın ali məktəbləri arasında yalnız Azərbaycan Ali Hərbi Məktəbinə Heydər Əliyevin adının verilməsi haqqında Fərman imzaladığına görə minnətdarıq.

Ümummilli liderimiz Heydər Əliyev Azərbaycan Silahlı Qüvvələri quruculuğunun ilhamçısı və banisidir. O, tariximizin ən mürəkkəb və qarışıq dövründə dövlətimizi və dövlətçiliyimizi məhv olmaqdan xilas etmişdir. Ordu quruculuğu Heydər Əliyevin həyat və fəaliyyətinin ən mühüm istiqamətlərindən biri olmuşdur. Onun 1971-ci ildə indiki Cəmşid Naxçıvanski adına Hərbi Litseyi yaratması bu böyük işin başlanğıcı idi.

Azərbaycan müstəqillik əldə etdikdən sonra Heydər Əliyev ölkəmizin Silahlı Qüvvələrini yenidən yaratdı, formalaşdırdı və bugünkü yüksək səviyyəyə qaldırdı. O, hər il Ali Hərbi Məktəb məzunlarının buraxılışında iştirak etmiş və öz xeyir-duasını vermişdir.

Bu il biz bu mərasimi onun cismani iştirakı olmadan keçiririk. Lakin bu gün onun qranitdən yonulmuş heykəli Azərbaycan Ali Hərbi Məktəbində ucaldılmışdır. Bundan sonra o, həmişə Azərbaycan Ali Hərbi Məktəbində olacaq, onun fəaliyyətini hər gün əbədiyyət ucalığından müşahidə edəcəkdir. Arzu edirəm ki, hərbi məktəbin bütün kursantları, müəllim, professor, zabit heyəti və rəhbərliyi ümummilli lider və əbədi Ali baş komandan Heydər Əliyevin adına və ruhuna layiq uğurlar qazansınlar.

Onu da qeyd etmək istəyirəm ki, bu il Heydər Əliyev adına Azərbaycan Ali Hərbi Məktəbinin yaradılmasının 65 ili tamam olur. Bu münasibətlə məktəbin bütün şəxsi heyətini təbrik edirəm.

Sabah Silahlı Qüvvələrimizin yaradılmasının 86-cı ildönümüdür. Bu bayram münasibətilə bütün mərasim iştirakçılarını və Silahlı Qüvvələrimizin təhsil ocaqlarının şəxsi heyətini təbrik edir və uğurlar arzulayıram.

Hörmətli mərasim iştirakçıları!

Hazırda Silahlı Qüvvələrimizin bütün təhsil sistemi təkmilləşmiş, tədris-maddi bazası zənginləşmişdir və müasir tələblərə cavab verir. Burada Azərbaycan Silahlı Qüvvələri üçün yüksək hazırlıqlı, vətənpərvər, Azərbaycan dövlətinə və Konstitusiyasına tam sədaqətli, hərtərəfli inkişaf etmiş, mənəvi və fiziki baxımdan sağlam zabitlərin hazırlanması üçün hər bir şərait vardır.

Respublikamızın Prezidenti, Silahlı Qüvvələrin Ali baş komandanı cənab İlham Əliyev öz çıxışlarında və respublikamızın bölgələrində, o cümlədən Naxçıvan Muxtar Respublikasında və Gəncədə hərbi hissələrdə keçirdiyi görüşlərdə Silahlı Qüvvələrimizin bugünkü vəziyyəti haqqında müsbət fikirlər söyləmişdir.

O, Gəncədə “N” hərbi hissəsində keçirdiyi görüş zamanı demişdir: “Ordu quruculuğunda böyük işlər görülübdür... Ordu quruculuğu və bu istiqamətdə əldə edilmiş uğurlar ölkəmizə imkan verib ki, bu gün Azərbaycanın nizamlı, güclü ordusu var.

Orduda peşəkarlıq artır, ordunun maddi-texniki bazası güclənir və biz böyük planlar həyata keçirəcəyik... Azərbaycanın buna imkanları var və orduya diqqət, qayğı bizim əsas məsələmizdir”.

Bu fikirlər Azərbaycan Silahlı Qüvvələrinin bütün şəxsi heyətinin, o cümlədən Silahlı Qüvvələrimizin təhsil ocaqlarının müəllim və zabit heyətinin qarşısında yeni vəzifələr qoyur və biz düşmən üzərində tam qələbə əldə etmək üçün təhsildə və təlimdə daha böyük uğurlar qazanmalıyıq.

Hörmətli mərasim iştirakçıları!

Bugünkü tədbirdə digər qonaqlarla bərabər qardaş Türkiyə Respublikasından gəlmiş bir qrup yüksək rütbəli zabit də iştirak edir. Onları bugünkü məzunlar, Azərbaycan Silahlı Qüvvələrinin şəxsi heyəti adından və öz adımdan bir daha salamlayır, hərbi təhsil sahəsində və ordu quruculuğunda Azərbaycana öz köməyini əsirgəməyən Türkiyə Respublikası Silahlı Qüvvələrinin rəhbərliyinə minnətdarlıq edirəm.

Mən bugünkü tədbirdə iştirak edən hərbi təhsil ocaqlarının rəhbərliyini, müəllim-professor və zabit heyətini, bu gün leytenant rütbəsi ilə Silahlı Qüvvələrimizin zabit heyətinin sıralarına qatılan məzunların valideynlərini ürəkdən təbrik edir və onlara gözaydınlığı verirəm.

Eyni zamanda, bu əlamətdar hadisə münasibətilə xalqımızı təbrik edərək deyirəm ki, gənc zabitlərin buraxılışı işğal altında olan torpaqlarımızın azad edilməsini daha da gerçəkləşdirir və bizi qələbəmizə daha da yaxınlaşdırır.

Mən bu gün çiyinlərinə leytenant poqonları taxmış gənc zabitlərimizə müraciətlə deyirəm: “Siz, ilk növbədə, Azərbaycan Silahlı Qüvvələrinin nizamnamələrini dərindən öyrənin. Hər bir zabit nizamnamələrin tələbi ilə yaşamalı və xidmət etməlidir. Silahlı Qüvvələrin nizamnamələri sizin hər birinizin stolüstü kitabı olmalıdır. Çünki zabit nizamnaməni təkcə özü üçün öyrənmir, onu həm də tabeliyində olanlara öyrədir”.

Bu sözlərlə demək istəyirəm ki, siz bütün həyatınızı və fəaliyyətinizi tabeliyinizdə olan əsgərlərə həsr etməlisiniz. Onları sevməlisiniz, onların məhəbbətini qazanmalısınız. O zaman sizin uğurlarınız çox olacaqdır. Hərbi xidmətdə bütün uğurların açarı komandir-əsgər münasibətlərinin sağlam olmasında və qarşılıqlı inam əsasında qurulmasındadır.

Sizə bir də bunları demək istəyirəm: “Heç vaxt unutmayın ki, sizin məzunu olduğunuz məktəb ümummilli lider, xalqımızın böyük oğlu Heydər Əliyevin adını daşıyır. Siz çalışmalısınız ki, bu məktəbin məzunu kimi yüksək şərəfə layiq olasınız. Vətənimizə və xalqımıza Heydər Əliyev kimi xidmət edəsiniz”.

Azərbaycan Silahlı Qüvvələrinin zabit korpusu sıralarına daxil olmağınız münasibətilə sizi bir daha təbrik edir, Azərbaycanın ərazi bütövlüyünün bərpası və düşmən üzərində tam qələbə naminə müqəddəs xidmətinizdə hər birinizə uğurlar arzulayıram.

Hörmətli mərasim iştirakçıları!

Əziz məzunlar!

Mən bu əziz gündə ümummilli liderimiz, Azərbaycan tarixinin Fəxri Prezidenti, Silahlı Qüvvələrin əbədi Ali baş komandanı Heydər Əliyevin xatirəsini bir daha yad edərək, onun Azərbaycan zabitlərinə müraciətlə deyilmiş məşhur sözlərini təkrarlayaraq çıxışımı sona yetirirəm.

O demişdir: “Bilin ki, sizin hər birinizin arxasında böyük Azərbaycan ölkəsi durmuşdur. Bilin ki, hər biriniz öz doğma Vətəninizi, öz ananızı, atanızı, bacınızı, qardaşınızı müdafiə etmək üçün ordu sıralarına gəlmişsiniz... Bu şərəfli vəzifənizi – Vətəni müdafiə etmək vəzifənizi yerinə yetirməkdə qəhrəmanlıq nümunələri göstərməyinizi arzulayıram”.

Diqqətinizə görə sağ olun.