Müəllimlərin sertifikasiyası üçün qeydiyyatdan keçənlərin 97 faizi imtahanlarda iştirak edib
Bakı, 29 mart, AZƏRTAC
Müəllimlərin sertifikasiyası üçün qeydiyyatdan keçənlərin 97 faizi imtahanlarda iştirak edib.
AZƏRTAC xəbər verir ki, bunu Təhsil İnstitutunun direktoru Rüfət Əzizov təkrar sertifikasiyada iştirak edəcək müəllimlər üçün təlimlərin təşkili ilə bağlı keçirilən brifinqdə deyib.
Onun sözlərinə görə, müəllimlərin 78 faizi imtahanlarda uğur qazanıb. İmtahanda uğur qazanan müəllimlərin maaşına əlavələr edilib: “5624 müəllimin maaşına 10 faiz, 3127 müəllimin maaşına 35 faiz əlavə edilib. Ötən il imtahanlarda uğurlu olmayan 22 faiz - 2472 müəllim ilə təlimlər keçirilir. Onlara iş yerlərində qalmaq üçün bir il möhlət verilib. Təkrar sertifikasiyada iştirak edəcəklər”.
Rüfət Əzizov əlavə edib ki, 5 il stajı tamam olmayan, hamilə olan müəllimlər istisna olmaqla hər kəs imtahanda iştirak etməlidir.
Bölmənin digər xəbərləri
