Mühasibat uçotu elektron formada aparılacaq subyektlər müəyyənləşdirilir
Bakı, 23 oktyabr, AZƏRTAC
Mühasibat uçotu elektron formada aparılacaq subyektlər müəyyənləşdirilir.
AZƏRTAC xəbər verir ki, bununla bağlı məsələ Milli Məclisin İqtisadi siyasət, sənaye və sahibkarlıq komitəsinin oktyabrın 23-də keçirilən iclasında ikinci oxunuşda müzakirəyə çıxarılan “Mühasibat uçotu haqqında” qanun layihəsində öz əksini tapıb.
Qanun layihəsi mühasibat uçotunu məcburi qaydada elektron formada aparacaq mühasibat uçotu subyektlərinin (hüquqi və fiziki şəxslərin) dairəsinin müəyyən edilməsi məqsədilə hazırlanıb. Bu müddəa Azərbaycan Respublikasının Vergi Məcəlləsində təsbit olunan elektron auditin aparılmasına dəstək verəcək, həmçinin layihədə qeyd olunan vergi ödəyiciləri tərəfindən müvafiq məlumatların aidiyyəti üzrə təqdim edilməsi sahəsində operativliyi artıracaq.
Bu Qanunun qüvvəyə minməsi ilə Vergi Məcəlləsinin 16.1.3-1-ci maddəsinin də tətbiqi təmin ediləcək. Yəni, həmin maddəyə əsasən vergi ödəyicisi mühasibat uçotunu məcburi qaydada elektron formada aparmalı şəxslər tərəfindən siyahısı və forması İqtisadiyyat Nazirliyi tərəfindən müəyyən edilən məlumatları aidiyyəti üzrə təqdim etməlidir. Bu maddə “Mühasibat uçotu haqqında” Qanuna mühasibat uçotunu məcburi qaydada elektron formada aparmalı şəxslərlə bağlı ediləcək dəyişikliklərlə eyni gündə qüvvəyə minir.
Mühasibat uçotunun elektron formada aparılması ilə bağlı tələb Azərbaycan Respublikasının Mərkəzi Bankına şamil edilməyəcək.
Layihəyə əsasən, iri sahibkarlıq subyektlərində və orta sahibkarlıq subyektlərində, qanunla təsdiq edilmiş hasilatın pay bölgüsü, əsas ixrac boru kəməri haqqında və digər belə sazişlər və ya qanunlar, o cümlədən neft və qaz haqqında, ixrac məqsədli neft-qaz fəaliyyəti haqqında qanunlar çərçivəsində fəaliyyət göstərən vergi ödəyicilərində, illik maliyyə hesabatlarını və ya birləşdirilmiş (konsolidə edilmiş) maliyyə hesabatlarını bu Qanuna uyğun olaraq dərc etməli olan publik hüquqi şəxs kimi subyektlərdə mühasibat uçotu elektron formada aparılacaq.
Mühasibat uçotunun elektron formada aparılması subyektlərdə uçotun şəffaflaşdırılmasına, vergi nəzarət tədbirlərinin optimallaşdırılmasına imkan verəcək.
Qanun layihəsi müzakirələrdən sonra ikinci oxunuşda plenar iclasa tövsiyə olunub.
Bölmənin digər xəbərləri
