MUSİQİLİ KOMEDİYA TEATRINDA XƏZƏR ŞER AXŞAMLARI KEÇİRİLMİŞDİR
AZƏRTAC-ın müxbiri xəbər verir ki, Azərbaycan mədəniyyət nazirinin müavini Ədalət Vəliyev, Yazıçılar Birliyinin sədri, Milli Məclisin deputatı Anar, Türkiyənin dövlət naziri Bəşir Atalay və başqaları Xəzər şer axşamları iştirarkçılarını salamlamış, türk xalqları arasında mədəni-ədəbi əlaqələrin genişləndirilməsində, şairlərimizin və elm adamlarımızın bir–birilərini yaxından tanımalarında belə tədbirlərin keçirilməsinin əhəmiyyətindən danışmışlar.
Xalq şairi Bəxtiyar Vahabzadənin xəstə olduğu üçün tədbirə qatıla bilmədiyi nəzərə alınaraq iştirakçılara onun haqqında çəkilmiş televiziya filmi göstərilmişdir. Şairin təltif edildiyi “Türk dünyası şer ödülü” onun nəvəsi Bəxtiyara təqdim olunmuşdur.
Türkiyənin Elazığ valiliyindən Kadır Koçdəmirə “Vektor” Beynəlxalq Elm Mərkəzinin Fəxri doktor diplomu və qiymətli hədiyyələr verilmişdir.
Bakıda Xəzər şer axşamlarının yüksək səviyyədə keçirilməsinə yaxından kömək göstərdiklərinə görə mədəniyyət naziri Polad Bülbüloğlu, Yazıçılar Birliyinin sədri Anar və başqaları tədbirin təşkilat komitəsi tərəfindən mükafatlandırılmışlar.
Tədbirdə Azərbaycan, Türkiyə, Qazaxıstan, Makedoniya, Şimali Kipr Türk Cümhuriyyəti şairlərinin şerləri dinlənilmişdir.
Türkiyənin ölkəmizdəki səfiri Əhməd Ünal Çeviköz, Milli Məclisin deputatları və ədəbi ictimaiyyətin nümayəndələri iştirak etmişlər.
Bölmənin digər xəbərləri
