Bakı, 19 sentyabr, AZƏRTAC

Hazırda koronavirus pandemiyasının geridə qaldığını düşündüyümüz bir zamanda “omikron” ştamından törəyən EG.5 virusu səbəbindən xəstəliklərə yoluxmanın artması həmin fikirləri dəyişib. EG.5 və digər adı “eris” olan virus nisbətən daha sürətlə yayılır. Bu isə epidemik vəziyyətin gərginləşə biləcəyini göstərir.

Bunu AZƏRTAC-a 2 saylı Ağciyər Xəstəlikləri Dispanserinin ağciyər üzrə mütəxəssisi həkim-ftiziatr Afət Novruzova deyib. O, infeksiyanın nəzarət altında saxlamağın vacibliyini vurğulayıb: “Sürətlə yayılması səbəbindən Ümumdünya Səhiyyə Təşkilatı (ÜST) EG.5 virusunu “nəzarətdə saxlanılan variantlar” siyahısından çıxararaq “diqqət tələb edən” variantlar siyahısına daxil edib. Eyni zamanda, ÜST “eris”in xəstəliyə yoluxma göstəricilərini sürətlə artırdığını bildirib. Son ay dünya üzrə yoluxanların sayı 38 faiz artıb. Avropada yoluxma artaraq 39, Sakit okeanın qərbində 52, Aralıq dənizinin şərqində isə 113 faizə çatıb. Koreya, İtaliya, Böyük Britaniya, Avstraliya və Sinqapur kimi dövlətlər də yoluxma sayında kəskin artım qeydə alınır. ÜST bütün dünya dövlətlərindən COVID-ə qarşı qabaqlayıcı tədbirlərin davam etdirilməsini tövsiyə edib və bildirib ki, yeni pandemiyanın qarşısını almaq üçün vəziyyətə ilkin müdaxilə vacibdir. COVID-in Hindistanda qeydə alınmış BA.2.86 adlı yeni alt növü səbəbindən əhali yenidən ictimai yerlərdə tibbi maskadan istifadə etməyə başlayıb. BA.2.86 virusu zamanı göz ətrafında qızartı və qaşınma müşahidə olunur”.

Həkim-ftiziatr virusdan qorunmağın metodları haqda danışıb: “EG.5 “omikron”un alt variantı olduğu üçün hər iki xəstəliyin əlamətləri oxşardır. Hərarət, öskürək, yorğunluq, burun axması, əzələ ağrıları, bəzi xəstələrdə ishal, dadbilmə və iybilmə hisslərinin azalması kimi simptomlarla özünü büruzə verir. Əlamətlərin bənzəməsi səbəbindən, adətən, xəstələr bunu soyuqdəymə və ya qrip virusu ilə qarışdırırlar. Ümumiyyətlə, EG.5 altvariantdır və xəstəlik yüngül gedişatlıdır. Lakin virusun sürətlə yayılmağı bütün dünyanı ciddi narahat edir. Peyvəndlənmə isə COVID-in bütün mutasiyalarının qarşısını müəyyən mənada alır və ən mükəmməl qorunma vasitəsi sayılır. İmmun sistemi zəif olan şəxslər, yanaşı xəstəlikdən əziyyət çəkənlər vaxtında peyvənd olunmalıdır. Qeyd etməliyəm ki, əhalinin böyük əksəriyyətinin son peyvəndlənmə müddətindən uzun zaman keçib və peyvəndin qoruma müddəti çox qısadır. Bu səbəbdən yeni virusa qarşı qorunma baryerimiz zəifdir. Əsasən, immuniteti aşağı olan yaşlı təbəqə yenidən peyvənd olunmalı və sağlamlığını daha ciddi qorumalıdır”.