Muxtar respublikada ailə, qadın və uşaq hüquqları qorunur
Naxçıvan, 11 mart, AZƏRTAC
Naxçıvan Muxtar Respublikasında ailə, qadın və uşaq hüquqlarının qorunması ötən ay da diqqətdə saxlanılıb, bununla əlaqədar bir sıra tədbirlər görülüb.
Muxtar respublikanın Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, muxtar respublikada yaşayan ailələr, qadın və uşaqlar haqqında məlumatlar komitədə yaradılmış bazaya əlavə edilib və təhlili aparılıb. Məlum olub ki, cari ilin yanvar ayında muxtar respublikada ailələrin sayı 98 min 198 olub. Bu da ötən illə müqayisədə 405 çox ailə deməkdir. Bəhs olunan dövrdə qadınların sayı 231 min 21 nəfərə çatıb. Uşaqların sayı isə 165 min 288 nəfər olub ki, bu da ötən illə müqayisədə 742 nəfər çoxdur.
Hesabat ayında ailələrin hüquqlarının qorunması, sosial problemlərinin öyrənilməsi və həll edilməsi diqqətdə saxlanılıb. Belə ki, Naxçıvan şəhərində yaşayan aztəminatlı Baxşəliyevlər ailəsinə baş çəkilib, onların problemləri ilə maraqlanılıb və ailəyə ehtiyaclarına uyğun köməklik göstərilib.
“Qadınların dayanıqlı inkişaf üçün səlahiyyətləndirilməsi” layihəsinin davamı olaraq “Naxçıvan Muxtar Respublikasında COVID-19-un təsirinə məruz qalmış qadınlara iqtisadi dəstək” layihəsi çərçivəsində sərmayə kapitalı verilmiş 39 qadından 6-nın yaşadığı ünvanlarda sərmayə kapitalından düzgün istifadə etmələri ilə bağlı monitorinq keçirilib.
Komitə və Yeni Azərbaycan Partiyası Sədərək Rayon Təşkilatı Qadınlar Şurasının təşkilatçılığı ilə Sədərək rayonunda yaşayan aztəminatlı ailənin üzvü, məhdud fiziki imkanlı qadınlara toxuculuq peşəsinin öyrədilməsi ilə bağlı təlim keçirilib. Təlimin keçirilməsində məqsəd aztəminatlı ailənin üzvü, məhdud fiziki imkanlı qadınları sosial layihələrə cəlb etmək, onların özünüməşğulluğunu təmin etmək, ailə büdcəsinin yaxşılaşdırılmasına köməklik göstərilməsidir. İstedadlı toxucu qadın Gülsüm Kəngərli əyani vasitələrdən istifadə etməklə iştirakçılara toxuculuq peşəsinin sirlərini öyrədib. Təlimdə Sədərək rayonunda yaşayan 6 aztəminatlı ailədən olan 9 məhdud fiziki imkanlı qadın və Sədərək Rayon Uşaq Gənclər Yaradıcılıq Mərkəzinin 4 dərnək rəhbəri iştirak ediblər.
Ötən ay uşaq hüquqlarının həyata keçirilməsinə dair elektron məlumat bankına 706 uşaq haqqında fərdi məlumatlar daxil edilib. Sağlamlıq imkanları məhdud uşaqların təhsili və reabilitasiyası ilə bağlı işlər görülüb, 3 uşaq məktəbdənkənar təlim-tərbiyə və müalicə-reabilitasiya müəssisələrinə göndərilib.
Kəngərli rayonunda fəaliyyət göstərən məktəbəqədər, ümumtəhsil məktəbləri və məktəbdənkənar müəssisələrdə sanitar-gigiyenik vəziyyətlə bağlı bu sahəyə məsul olan şəxslərin iştirakı ilə maarifləndirici seminar keçirilib, müvafiq sahə ilə əlaqədar hazırlanmış 50 broşür seminar iştirakçılarına paylanılıb.
Naxçıvan Мuxtar Respublikasında uşaq hüquqlarının qorunması ilə əlaqədar 4 uşaq müəssisəsində və valideynlərini itirmiş və valideyn himayəsindən məhrum olmuş 4 uşağın evində monitorinq keçirilib, aşkar edilən nöqsanlar aktlaşdırılıb, tədbir görülməsi üçün aid orqanlara məktub göndərilib.
Bölmənin digər xəbərləri
