Nağara ifaçısı: Konsertlərdə dəfələrlə çıxış etsəm də, imtahan həyəcanı qaçılmazdır
Bakı, 3 iyul, AZƏRTAC
Qabiliyyət imtahanı yüksək səviyyədə təşkil olunub. İmtahan prosesindən razıyam, əldə etdiyim nəticə isə uzunmüddətli hazırlığın bəhrəsidir.
Bu fikri AZƏRTAC-a müsahibəsində Dövlət İmtahan Mərkəzi (DİM) tərəfindən keçirilən musiqi istiqaməti üzrə qabiliyyət imtahanının iştirakçısı - nağara ifaçısı Vəfadar Ramizzadə söyləyib. O bildirib ki, nağara ixtisası üzrə keçirilən qabiliyyət imtahanı şəffaf və qaydalara uyğun təşkil olunub.
İmtahanda 9 bal topladığını bildirən ifaçı bu nəticənin arxasında uzun hazırlıq prosesinin dayandığını vurğulayıb.
“Konsertlərdə, böyük səhnələrdə dəfələrlə çıxış etmişik. Amma imtahanda ifa edərkən həyəcan qaçılmaz olur. Düşünürəm ki, bu da müəyyən qədər nəticəyə təsir edə bilər. Bununla belə, qiymətləndirmədən razıyam”, - deyə V. Ramizzadə söyləyib.
O, musiqiyə olan marağının ailədən qaynaqlandığını da diqqətə çatdırıb: “Musiqiçi ailəsində böyümüşəm. Bu sənətə sevgim də elə ailədən gəlir”.
Vəfadar Ramizzadə qeyd edib ki, Şəki şəhərində musiqi məktəbini, daha sonra isə Bakıda Asəf Zeynallı adına Musiqi Kollecini bitirib. O bildirib ki, ali təhsilini də nağara ixtisası üzrə davam etdirmək istəyir və əsas hədəfi Azərbaycan Milli Konservatoriyasına və ya Azərbaycan Dövlət Mədəniyyət və İncəsənət Universitetinə qəbul olmaqdır.
Bölmənin digər xəbərləri
