NATO-nun Baş katibi Türkiyənin Aİ-nin SAFE silahlanma sxemində iştirakını dəstəkləyib
Bakı, 16 sentyabr, AZƏRTAC
NATO-nun Baş katibi Mark Rütte Türkiyənin Avropa İttifaqının (Aİ) SAFE silahlanma sxemində iştirakını dəstəklədiyini bildirib.
AZƏRTAC Anadolu agentliyinə istinadla xəbər verir ki, gündəlik “Kathimerini” nəşrinin Avropa mənbələrindən aldığı məlumata görə, Rütte bu dəstəyi Avropa Komissiyasının Türkiyənin SAFE-yə qoşulmaq üçün müraciətini təsdiqlədikdən sonra Aİ səfirləri ilə görüşü zamanı ifadə edib. O, NATO çərçivəsində Aİ-Türkiyə əməkdaşlığının gücləndirilməsinin vacibliyini vurğulayıb və Ankaranın bu sxemə cəlb edilməsinin NATO ilə Aİ dövlətləri arasında həssas məlumatların paylaşılmasına dair uzun müddətdir davam edən etirazlarını yumşalda biləcəyini iddia edib.
Baş katib, həmçinin dövlətləri Türkiyənin hərbi imkanlarını tanımağa və xoşməramlılıq nümayiş etdirməyə çağırıb.
May ayında Aİ liderləri tərəfindən qəbul edilmiş SAFE sxemi üzrə təcili müdafiə satınalmalarını sürətləndirmək üçün rəqabətədavamlı silahların tədarükü məqsədilə uzunmüddətli kreditlər ayrılacaq. O, Avropa Komissiyasının 800 milyard avrodan çox müdafiə xərclərini səfərbər etməyi hədəfləyən 2030-cu ilədək Avropanın yenidən silahlanma planının bir hissəsini təşkil edir.
Kreditlər yalnız Aİ-yə üzv dövlətlərə verilsə də, Ukrayna və AEA-EFTA ölkələri də sxem üzrə birgə satınalmalarda iştirak etmək hüququ qazanacaqlar. Yunanıstan Türkiyənin SAFE-də iştirakına ən kəskin etiraz edən ölkə olaraq qalır.
Bölmənin digər xəbərləri
