Son vaxtlar “Yeni Müsavat” qəzetində Naxçıvan Muxtar Respublikası haqqında həqiqətə uyğun olmayan, mənbəyi və mənsəbi “mötəbər mənbələr” adı altında gizlədilən, sifarişlı, qərəzli yazılar dərc edilməkdədir.

“Yeni Musavat” qəzetinin gündəlik nəşrlərində və rəsmi internet saytında bu məsələ ilə əlaqədar müxtəlif başlıqlar altında reallıqdan kənar, qondarma və şayiə xarakterli yazılar Naxçıvan Muxtar Respublikasının ictimaiyyətini narahat etməkdədir.

Adı çəkilən qəzetin 2010-cu il 19 avqust tarixli sayında, üzdəniraq “köşə yazarı” Samir Sarı “Şeytan piarına qadağa” başlıqlı yazısında Naxçıvan Muxtar Respublikasında fəaliyyət göstərən ruhanilərin və dindarların fəaliyyətinə dair cəmiyyətdə çaşqınlıq salınmasına hesablanmış ifadələr işlətmiş, ölkə mətbuatının gündəmində öz absurd fikirləri ilə yer tutmağa çalışmışdır.

Mübarək Ramazan ayında olduğumuz bu günlərdə “Yeni Müsavat” qəzetində yer almış bu məkrli yazının müsəlman qardaşlarımızın dini heysiyyatına toxunması, ciddiyyətdən uzaq və istehza dolu olması muxtar respublikanın əhalisi tərəfindən hiddətlə qarşılanmaqdadır.

Qeyd olunan yazı “Yeni Müsavat” qəzetində dərc edilməsi ilə Naxçıvan Muxtar Resbublıkasının dindarları arasında əsaslı narazılıq doğurmuş, Naxçıvan Muxtar Respublikasının qazisinə çoxsaylı müraciətlər edilmişdir.

Tam yəqinliklə demək olar ki, Naxçıvan Muxtar Respublikasına və bu gözəl diyarın inanclı insanlarına qarşı “Yeni Müsavat” qəzetinin mövqeyi düşmənçilik xarakterli olub şeytana xidmətdən başqa bir şey deyildir.