Naxçıvan Muxtar Respublikası Təhsil Nazirliyinin yaranmasının 95 illik yubileyi münasibətilə tədbir keçirilib
Naxçıvan, 14 oktyabr, Rauf Əliyev, AZƏRTAC
Naxçıvan Muxtar Respublikası Təhsil Nazirliyinin yaranmasının 95 illik yubileyi münasibətilə tədbir keçirilib. Tədbir iştirakçıları əvvəlcə ulu öndər Heydər Əliyevin Naxçıvan şəhərinin baş meydanında əzəmətlə ucalan abidəsini və Heydər Əliyev Muzeyini ziyarət ediblər.
AZƏRTAC xəbər verir ki, nazirliyin inzibati binasında keçirilən tədbirdə Naxçıvan Muxtar Respublikasının təhsil naziri Piri Nağıyev çıxış edərək, bu gün 95 illik yubileyi qeyd edilən Naxçıvan təhsilinin tarixi inkişaf yolu keçdiyini qeyd edib.
Nazir bildirib ki, Naxçıvanda maarif və təhsil hələ qədim dövrlərdən inkişaf edib. XIX əsrin sonlarında Naxçıvanda üsuli-cədid məktəbləri yaradılıb. XX əsrin əvvəllərində maarif şəbəkəsi genişlənib, diyarın şəhər və kəndlərində müxtəlif səviyyəli dünyəvi məktəblər açılıb. 1920-ci ilədək Naxçıvanda, təqribən 2 min şagirdin təlim-tərbiyəsi ilə məşğul olan 45 məktəb fəaliyyət göstərirdi. Naxçıvan İnqilab Komitəsinin 1920-ci il oktyabrın 10-da qəbul etdiyi qərara əsasən, Naxçıvanda həmin məktəbləri özündə birləşdirən ilk Təhsil Şöbəsi yaradılıb.
Qeyd olunub ki, ulu öndər Heydər Əliyevin Azərbaycana rəhbərliyinin birinci dövründə milli təhsilin inkişafı istiqamətində də mühüm tədbirlər həyata keçirilib. 1969-82-ci illərdə Azərbaycanın ayrılmaz tərkib hissəsi olan Naxçıvan Muxtar Respublikasında da bütün sahələrlə yanaşı, təhsilin inkişafı xalqımızın böyük oğlunun diqqətində idi. Təhsilin inkişafını ölkəmizin, xalqımızın gələcəyi hesab edən ümummilli lider Heydər Əliyevin bu sahədə müəyyənləşdirdiyi strategiya muxtar respublikada uğurla davam etdirilməkdədir.
Piri Nağıyev bildirib ki, muxtar respublikada təhsilə göstərilən yüksək dövlət qayğısının nəticəsində nailiyyətlər əldə olunub. 1995-2015-ci illər ərzində ümumtəhsil məktəblərinin ali təhsil müəssisələrinə tələbə qəbulunun nəticələri bunun əyani sübutudur. Belə ki, 1995-1996-cı tədris ilində ümumtəhsil məktəblərini bitirmiş 3512 məzundan 1301 nəfəri ali təhsil müəssisələrinə qəbul üçün sənəd verib və onlardan 401 nəfəri respublikamızın müxtəlif ali təhsil ocaqlarına daxil olub. 2014-2015-ci tədris ilində isə ümumtəhsil məktəblərini 3331 məzun bitirib, onlardan 2638 nəfəri, məktəbi bitirənlərin 79,2 faizi ali məktəblərə sənəd verib. Qəbul imtahanlarında iştirak edən abituriyentlərdən 1582 nəfəri ali məktəblərə qəbul olunub ki, bu da sənəd verənlərin 60 faizini təşkil edir. Ali məktəblərə qəbul olunanlardan 313 nəfəri 500-700 intervalında bal toplayıb. Müqayisə üçün qeyd edək ki, bu göstərici 1995-1996-cı tədris ilində 5 nəfər olub.
Tədbirdə Şərur Rayon Təhsil Şöbəsinin müdiri Zaur Həsənov, Naxçıvan Qızlar Liseyinin direktoru Aidə Allahverdiyeva, Babək rayon Qoşadizə kənd tam orta məktəbinin Azərbaycan dili və ədəbiyyat müəllimi Şəmsiyyə Əsgərova çıxış edərək, muxtar respublikada təhsilə göstərilən diqqət və qayğıdan danışıblar.
Çıxışlarda qeyd olunub ki, təhsil sistemimizin dünya təhsilinə inteqrasiyası və qazanılmış təcrübənin müasir dövrlə əlaqələndirilməsi yolu ilə muxtar respublikada geniş dünyagörüşə, aydın təfəkkürə, sağlam düşüncəyə malik vətənpərvər gənclərin yetişdirilməsi təhsil işçilərinə etibar edilib. Onlar bu etibarı doğrultmaq, qarşıya qoyulan bütün vəzifələri layiqincə yerinə yetirmək üçün daha da mütəşəkkil işləməyə, bilik və bacarıqlarını daim artırmağa və səmərəli tətbiq etməyə borcludurlar.
Sonda muxtar respublikanın bir qrup qabaqcıl təhsil işçisinə Naxçıvan Muxtar Respublikası Təhsil Nazirliyinin fəxri fərmanı təqdim olunub.
Bölmənin digər xəbərləri
