“Naxçıvan” Universitetinin kollektivi Milli Dəyərlər Muzeyini ziyarət edib
Naxçıvan, 23 noyabr, AZƏRTAC
“Naxçıvan” Universitetinin kollektivi muzey günləri çərçivəsində Naxçıvan şəhərində yerləşən Milli Dəyərlər Muzeyini ziyarət edib.
Universitetin mətbuat xidmətindən AZƏRTAC-ın Naxçıvan bürosuna bildirilib ki, muzeyin bələdçisi mədəniyyət müəssisəsi barədə universitet əməkdaşlarına ətraflı məlumat verib. Bildirib ki, Milli Dəyərlər Muzeyi 2019-cu il sentyabrın 23-də istifadəyə verilib. Muzey 1 otaq və 3 ekspozisiya zalından ibarətdir. Hazırda muzeyin fondunda 236 eksponat vardır. Ekspozisiyada Azərbaycan Respublikasının Dövlət Bayrağı, Gerbi və Dövlət Himninin mətni, milli geyimlərimiz və qədim mətbəx əşyalarımız, xalçalar və milli musiqi alətlərimiz nümayiş olunur. Milli sənətkarlıq nümunələrindən ibarət eksponatlar, muxtar respublikanın tarixi, mədəniyyəti, memarlıq abidələri, adət-ənənələri ilə bağlı çap olunmuş kitab və ensiklopediyalar, turizm potensialının təbliğinə dair bukletlər müxtəlif guşələrdə sərgilənir.
Bölmənin digər xəbərləri
