NAXÇIVANDA KƏND TƏSƏRRÜFATI DİNAMİK İNKİŞAF EDİR
Naxçıvan, 29 aprel (AZƏRTAC). Naxçıvan Muxtar Respublikası Dövlət Statistika Komitəsindən bildirmişlər ki, 2009-cu ilin yanvar-martında muxtar respublikanın maliyyə-kredit təşkilatları tərəfindən kənd təsərrüfatı müəssisələrinə, balıqçılıq təsərrüfatlarına və ayrı-ayrı fiziki şəxslərə 1 milyon 923 min 150 manat məbləğində kredit verilmişdir.
“Naxçıvan Aqrolizinq” Açıq Səhmdar Cəmiyyəti tərəfindən bu ilin birinci rübündə 19, ümumilikdə isə 365 müxtəlif kənd təsərrüfatı texnikası alınaraq gətirilmişdir.
Muxtar respublikada üç ay ərzində 12 min 462 hektar sahədə yazlıq bitkilərin əkini aparılmışdır. Bu, 2008-ci ilin müvafiq dövrü ilə müqayisədə 3,9 faiz artıqdır.
Aprelin 1-nə bütün təsərrüfatlar üzrə iribuynuzlu mal-qaranın sayı 104 min 307, davarların sayı isə 631 min 664 baş olmuşdur. Bu, ötən ilin göstəricilərindən müvafiq olaraq 1,3 və 1,2 faiz çoxdur.
Ümumilikdə, ilin birinci rübündə muxtar respublikanın aqrar sahəsində və balıqçılıq təsərrüfatında ötən ilin müvafiq dövrünə nisbətən müqayisəli qiymətlərlə 2,9 faiz çox və ya 13 milyon 900 manatlıq məhsul istehsal edilmişdir.
Bölmənin digər xəbərləri
