NAXÇIVANDA QAÇQINLAR ÜÇÜN YAŞAYIŞ BİNASI TİKİLİR
Dövlətqaçqınkomun mətbuat xidmətindən AZƏRTAC-a verilən məlumatda bildirilir ki, baş nazirin müavini, komitənin sədri Əli Həsənov bu günlərdə Naxçıvan Muxtar Respublikasına səfəri zamanı ölkəmizin bu bölgəsində daimi məskunlaşmamış qaçqınlar üçün inşa edilən dördmərtəbəli, 48 mənzilli yaşayış binasında tikinti işlərinin gedişi, qaçqın və məcburi köçkünlərin sosial-məişət şəraiti ilə, onları narahat edən problemlərlə tanış olmuşdur.
Azərbaycanın bu bölgəsi uzun illər blokada vəziyyətində olsa da, buraya pənah gətirmiş 1324 qaçqın və məcburi köçkün ailəsi qayğı ilə əhatə olunmuşdur. Bununla belə, 101 ailə hələ də yataqxanalarda və inzibati binalarda məskunlaşmışdır.
Azərbaycan Prezidenti Heydər Əliyevin 2001-ci il 22 avqust tarixli Fərmanına uyğun olaraq, həmin ailələr üçün yeni mənzillərin tikilməsi qərara alınmışdır. Dövlət Neft Fondundan ayrılmış vəsait hesabına inşa edilən dördmərtəbəli yaşayış evində əsas işlər başa çatmaq üzrədir. Bundan əlavə, müxtəlif ərazilərdə məskunlaşan qaçqın-köçkünlər üçün daha 53 fərdi evin tikilməsi də nəzərdə tutulmuşdur.
Qaçqın və köçkünlərə 261 milyon manatlıqdan çox yardım paylanmışdır.
Bölmənin digər xəbərləri
