NAZİRLƏR KABİNETİ MƏTBUAT XİDMƏTİNİN MƏLUMATI
Fevralın 21-də Azərbaycan Respublikasının Baş naziri Artur Rasizadə “Bakıelektrikşəbəkə” Səhmdar Cəmiyyətini idarəetməyə götürmüş “Barmek Holdinq AŞ” şirkətinin prezidenti Hüseyn Arabulu qəbul etmişdir.
Görüşdə “Bakıelektrikşəbəkə” Səhmdar cəmiyyəti idarəetməyə götürüldükdən sonrakı müddətdə şirkət tərəfindən götürülən işlər müzakirə edilmişdir.
Bakı şəhərinin elektrik təchizatının yaxşılaşdırılması ilə yanaşı, enerji haqqının ödənilməsi və elektrik enerjisinə qənaət edilməsi istiqamətində görülən tədbirlər əsas diqqət mərkəzində olmuşdur.
Hüseyn Arabul qeyd etmişdir ki, qısa müddət ərzində Bakı şəhərində 60-a yaxın transformator yeniləri ilə əvəz edilmiş, 7 kilometrlik yüksək gərginlikli elektrik xətləri çəkilmiş, transformator təmiri sexi yenidən qurulmuş, 3 mindən artıq elektrik sayğacı quraşdırılmışdır.
İri ticarət və xidmət obyektlərində \Şadlıq evləri, bazarlar, ticarət mərkəzləri və s\, habelə xüsusi layihələr üzrə inşa edilmiş yaşayış evləri və ofis binalarında enerji uçotunun vəziyyəti araşdırılmış, bir sıra ciddi pozuntular aşkar edilərək aradan qaldırılmışdır.
Söhbət zamanı Külli miqdarda enerji götürən, lakin onun haqqını ödəməyən müəssisə və təşkilatlara qarşı daha ciddi tədbirlərin görülməsinin vacibliyi qeyd edilmişdir.
Hüseyn Arabul büdcədən maliyyələşdirilən istehlakçılar tərəfindən enerji haqqının yanvar-fevral aylarında ödənilməsində çətinliklər yarandığını nəzərə çatdırmış və həmin istehlakçı təşkilatlara büdcədən müvafiq maliyyələşmənin açılması barədə göstəriş verilməsini xahiş etmişdir.
Bildirilmişdir ki, məcburi köçkünlərin məskunlaşdığı binalara müstəqil elektrik xətlərinin çəkilməsi işləri aparılır. Bu bir tərəfdən məcburi köçkünlərin enerji təchizatını əsaslı şəkildə yaxşılaşdırmağa, digər tərəfdən bir çox müəssisə və təşkilatların köçkünlərin adından istifadə edərək enerji almaq cəhdlərinə son qoymağa imkan verəcəkdir.
Enerji haqqının nəzarətçilər tərəfindən nəğd yığımı qəti olaraq dayandırılmış, ödənişlər yalnız banklar və poçt şöbələri vasitəsi ilə aparılır. Eyni zamanda, enerji uçotunun sağlamlaşdırılmasına və enerji satışında mənfi halların aradan qaldırılmasına maneçilik törədən əməkdaşların tutduğu vəzifələrdən kənarlaşdırılması üçün tədbirlər görülür.
Görüşdə istehlak edilən enerji haqqının ödənilməsinin əsaslı şəkildə artırılmasının vergi və sosial ödəmələrin yerinə yetirilməsində vacib amil olduğu qeyd edilmiş, bununla bağlı məsələlər müzakirə edilmişdir.
Qeyd edilmişdir ki, qısa müddət ərzində enerji sistemində aparılan islahatlar öz müsbət nəticəsini verməkdədir və idarəetmə müqaviləsinə uyğun olaraq müvafiq nazirlik, idarə və təşkilatlar bu istiqamətdə “Barmek Holdinq AŞ” şirkətinə lazımi kömək göstərirlər.
Görüşdə həmçinin mövcud qanunvericiliyə uyğun olaraq elektrik və istilik enerjisindən istifadəni tənzimləyən bir sıra normativ sənədlərin hazırlanması işlərinin sürətləndirilməsinin vacibliyi vurğulanmışdır.
Hüseyn Arabul aparılan işlərdə onun başçılıq etdiyi şirkətə əməli kömək göstərdiyinə görə Baş nazirə öz təşəkkürünü bildirmişdir.
Bölmənin digər xəbərləri
