NAZİRLƏR KABİNETİNDƏ GÖRÜŞ
AZƏRTAC xəbər verir ki, sentyabrın 26-da Azərbaycan Respublikasının Baş naziri Artur Rasizadə MDB üzvü olan ölkələrin inşaat fəaliyyəti sahəsində əməkdaşlıq üzrə Hökumətlərarası Şurasının Bakıda keçirilən XXVI iclasında iştirak edən nümayəndə heyətlərinin rəhbərləri ilə görüşmüşdür.
Baş nazir Artur Rasizadə Azərbaycan ilə MDB-nin digər üzv dövlətləri arasında əməkdaşlığın və qarşılıqlı faydalı əlaqələrin bir çox sahələr üzrə inkişaf etdiyini, o cümlədən inşaat sektorunda da belə əlaqələrin genişləndirilməsinin zəruriliyini vurğulamışdır. Ölkəmizin ictimai-siyasi və sosial-iqtisadi durumu barədə qonaqlara məlumat verən Baş nazir demişdir ki, qlobal enerji və nəqliyyat layihələrinin reallaşdırılması iqtisadiyyatımızın sürətli inkişafına, müxtəlif yönlü sosial proqramların uğurla həyata keçirilməsinə imkan yaratmışdır.
Respublikamızın qarşısında duran ən böyük problemin Ermənistan-Azərbaycan, Dağlıq Qarabağ münaqişəsi olduğunu xatırladan Baş nazir Artur Rasizadə demişdir ki, Azərbaycan münaqişəni beynəlxalq hüquq müstəvisində nizama salınmasına çalışsa da, Ermənistanın qeyri-konstruktiv mövqeyi üzündən problemin həlli uzanır.
Nümayəndə heyətinin üzvləri çıxış edərək, Şuranın Bakı iclasında müzakirə olunan məsələlərin inşaat və mənzil kommunal təsərrüfatı sahəsində bütün MDB dövlətləri üçün əhəmiyyət kəsb edəcəyinə əminliklərini bildirmişlər. Qeyd olunmuşdur ki, tikinti işlərinin belə təcrübə mübadilələri həmişə səmərəli nəticələr verir.
Görüşün sonunda Şuranın Bakı iclasının yüksək səviyyədə hazırlanmasına və göstərilən qonaqpərvərliyə görə nümayəndələr Azərbaycan hökumətinə təşəkkür etmişlər.
Bölmənin digər xəbərləri
