Neft DİM 7-yə nail olunmasında mühüm rol oynaya bilər
Vyana, 6 fevral, AZƏRTAC
Hazırda dünyada 666 milyondan çox insan elektrik enerjisinə çıxışdan məhrumdur. Bu problemin aradan qaldırılması BMT-nin Dayanıqlı İnkişaf Məqsədi 7 (DİM 7) çərçivəsində əsas hədəflərdən biri kimi müəyyən edilib və 2030-cu ilə qədər hamı üçün əlçatan enerji təminatını nəzərdə tutur. Mütəxəssislər bildirirlər ki, elektrik enerjisinə çıxışın genişləndirilməsilə bağlı beynəlxalq hesabatlarda əsas diqqət bərpaolunan enerji mənbələrinə yönəldilsə də, neft və digər karbohidrogenlərin rolu çox vaxt diqqətdən kənarda qalır. Halbuki tarix göstərir ki, yüz milyonlarla insanın qısa müddətdə elektrik enerjisinə çıxışı müxtəlif enerji mənbələrinin kombinasiyası hesabına mümkün olub.
AZƏRTAC xəbər verir ki, bu barədə məlumat OPEC-in rəsmi saytında yer alıb.
Qeyd olunur ki, ucqar və elektrik şəbəkəsindən kənarda yerləşən yaşayış məntəqələrində, eləcə də, zəif infrastruktur şəraitində dizel generatorları praktik və sürətli həll yolu kimi çıxış edir. Elektrik enerjisindən məhrum olan əhalinin 84 faizinin kənd ərazilərində yaşaması bu yanaşmanın əhəmiyyətini artırır.
Bundan əlavə, dizel əsaslı elektrik istehsalı aşağı ilkin xərcləri və operativ tətbiq imkanları ilə seçilir. Məlumatda həmçinin qeyd edilir ki, neftin digər mühüm rolu isə fövqəladə ehtiyat enerji təminatı sahəsindədir. Xəstəxanalar, hava limanları və digər kritik obyektlərdə dizel generatorları etibarlı ehtiyat enerji mənbəyi kimi geniş istifadə olunur.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
