NEFT MAŞINQAYIRMA SƏNAYESİNİN İNKİŞAFINA DİQQƏT ARTIR
Nazir Fərhad Əliyev Azərbaycanda yaranmış davamlı siyasi sabitlik nəticəsində iqtisadiyyatın dinamik inkişaf etdiyini, sərmayə qoyuluşu üçün münbit şərait yarandığını, ölkəmizin iqtisadiyyatına xarici sərmayə axınının gücləndiyini vurğulamış, MDB məkanında Azərbaycanın ən çox xarici sərmayə cəlb edən ölkəyə çevrildiyini bildirmişdir.
Azərbaycan-Yaponiya iqtisadi əlaqələrinə xüsusi əhəmiyyət verildiyini bildirən nazir Azərbaycan Prezidenti Heydər Əliyevin 1998-ci ilin fevralında Yaponiyaya rəsmi səfərindən sonra ölkələrimiz arasında əməkdaşlığın inkişafında yeni mərhələnin başlandığını vurğulamış, səfər zamanı aparılan danışıqların nəticəsi olaraq, ikitərəfli əlaqələrin daha da genişləndirilməsi üçün mühüm addımlar atıldığını qeyd etmişdir. Hazırda Azərbaycanda iqtisadiyyatın müxtəlif sahələri üzrə həyata keçirilən bir sıra layihələrin maliyyələşdirilməsində yapon şirkətləri fəal iştirak edirlər.
Bu görüşü ölkələrimiz arasında genişlənən iqtisadi münasibətlərin inkişafında növbəti addım kimi qiymətləndirən nazir F.Əliyev bu əlaqələrin genişlənməsində Azərbaycanın maraqlı olduğunu vurğulayaraq, yapon şirkətlərini ölkəmizə sərmayə qoyuluşunu artırmağa, kənd təsərrüfatı, maşınqayırma, kimya sənayesi və sair sahələrdə əməkdaşlığı genişləndirməyə dəvət etmişdir.
Yaponiya nümayəndə heyətinin başçısı Hirosi Tsukamoto Azərbaycanda həyata keçirilən iqtisadi islahatların gedişini izlədiyini qeyd edərək, ölkəsində Azərbaycanla qarşılıqlı əlaqələrin inkişafına xüsusi önəm verildiyini vurğulamışdır. O, demişdir ki, Yaponiyanın Xarici Ticarətin İnkişafı Təşkilatı 1999-ci ildən başlayaraq, Azərbaycanın qeyri-neft sektorunun inkişafına fəal dəstək verir. Təşkilat tərəfindən Azərbaycanda istehsal olunan ərzaq məhsullarının ixrac potensialının artırılması üzrə proqramlar, neft quyularından çıxan lay sularının emalı zavodunun tikintisinin texniki-iqtisadi əsaslandırılması həyata keçirilmiş, Bakıda “Kiçik və orta biznesin inkişafı” mövzusunda seminarlar, Tokioda “Cənubi Qafqazın üç ölkəsinin sərgisi” və “Azərbaycana sərmayə qoyuluşu” seminarları təşkil olunmuşdur.
Sonra Azərbaycan Respublikası və Yaponiyanın Xarici Ticarətin İnkişafı Təşkilatı arasında ölkəmizdə neft maşınqayırma sənayesinin inkişafına texniki yardım göstərilməsi ilə bağlı Anlaşma Memorandumu imzalanmışdır.
Memorandumu iqtisadi inkişaf naziri Fərhad Əliyev və Yaponiyanın Xarici Ticarətin İnkişafı Təşkilatının prezidenti Hirosi Tsukamoto imzaladılar.
Sənədə əsasən, Yaponiyanın Xarici Ticarətin İnkişafı Təşkilatının texniki yardımı əsasında birgə layihənin həyata keçirilməsi nəzərdə tutulur.
Layihəyə görə, Yaponiyanın Xarici Ticarətin İnkişafı Təşkilatının texniki yardımı əsasında “Azərneftkimyamaş” SC-də Amerika Neft İnstitutunun standartlarına uyğun avadanlıq quraşdırılacaqdır.
Layihənin həyata keçirilməsi Azərbaycanda maşınqayırma sənayesinin inkişafı üçün ANİ standartlarına uyğun texnologiyaların və “nou-hau”ların tətbiqinə imkan verəcəkdir. Bu isə “Azərneftkimyamaş” Səhmdar Cəmiyyətinə öz məhsullarının satışını nəinki Azərbaycanda genişləndirməyə, eləcə də xarici ölkələrə ixracına imkan verəcəkdir.
Ümumi dəyəri 1,4 milyard yapon yeni (təxminən 13 milyon ABŞ dolları) olan bu layihə “Mitsui ənd Jo Ltd” şirkəti tərəfindən reallaşdırılacaqdır.
Bölmənin digər xəbərləri
