NEFTİN AVROPAYA NƏQLİ ÜÇÜN YAXIN PERSPEKTİVDƏ DAHA BİR BORU KƏMƏRİNƏ EHTİYAC YOXDUR
AZƏRTAC xəbər verir ki, bu fikri Azərbaycan Prezidenti İlham Əliyev xarici ölkələrin kütləvi informasiya vasitələrinin Rusiyada akkreditə olunmuş nümayəndələri ilə görüşündə İspaniyanın “El Correo” qəzetinin müxbirinin sualına cavabında söyləmişdir. Dövlətimizin başçısının sözlərinə görə, Xəzərdən enerji ehtiyatlarının Avropaya göndərilməsi üçün artıq üç boru kəməri vardır. Onların ikisi nefti Qara dənizə, biri isə Aralıq dənizinə nəql edir və buradan Avropa və dünya bazarlarına göndərilir. Qaz kəməri isə ilin sonunadək tikilib başa çatdırılacaqdır. Beləliklə, Azərbaycan qazı Gürcüstan ərazisi ilə Türkiyə bazarına, sonra isə dünya bazarlarına çıxarılacaqdır.
Prezident demişdir ki, Azərbaycanın maraq göstərdiyi Avropa qaz və neft boru kəməri sistemləri mövcuddur. Ukrayna və Qara dəniz hövzəsinin digər ölkələri – Bolqarıstan, Rumıniya ilə əməkdaşlığımız vardır. Bu mənada mövcud boru kəməri sisteminin potensialından istifadə etmək olar.
Bölmənin digər xəbərləri
