“Nəriman Nərimanov - 155” adlı elektron məlumat bazası istifadəçilərə təqdim edilib
Bakı, 14 aprel, AZƏRTAC
Bu gün görkəmli dövlət xadimi, həkim, yazıçı, publisist Nəriman Nərimanovun anadan olmasının 155 illiyi tamam olur. Bu münasibətlə Cəfər Cabbarlı adına Respublika Gənclər Kitabxanasında “Nəriman Nərimanov -155” adlı elektron məlumat bazası hazırlanıb.
Kitabxanadan AZƏRTAC-a bildirilib ki, özündə bir sıra bölmələri cəmləyən bazada yazıçının həyat və fəaliyyətinin əsas tarixləri, bir sıra görkəmli şəxslərin onun haqqında söylədikləri dəyərli fikirlər, rəsmi sənədlər, müəllifi olduğu hikmətli fikirlərlə yanaşı, AMEA Tarix və Etnologiya İnstitutunun direktor müavini, tarix elmləri doktoru İlqar Niftəliyevin “Nəriman Nərimanov və Azərbaycanın milli maraqları”, ədəbiyyatşünas, filologiya elmləri doktoru, professor Rüstəm Kamalın “Doktor Nərimanov bir metaforanın qurbanı” kimi məqalələrinin tam mətni təqdim edilir.
Elektron bazada Nəriman Nərimanovun müəllifi olduğu yaradıcılıq nümunələrinin, məcmuələrdə, dövri mətbuatda dərc edilmiş əsərlərinin, məqalələrinin, məruzələrinin, imzaladığı dekretlərin, əmrlərin, sərəncamların, məruzə və çıxışların siyahıları da yer alır. Kitabxana əməkdaşları tərəfindən hazırlanan bazada “Nəriman Nərimanovun oğluna bitməmiş məktubu”, “Dissertasiya və avtoreferatlar”, “Xatirəsinin əbədiləşdirilməsi”, “İzonəşrlər”, “Filmoqrafiya”, “Foto və videoqalereya” bölmələri, kitablarının virtual sərgisi də təqdim edilir.
Elektron məlumat bazası kitabxananın rəsmi saytında yerləşdirilib.
Bölmənin digər xəbərləri
