NİGERİYADA GÜNƏŞİN TUTULMASI ƏHALİNİN NARAHATLIĞINA SƏBƏB OLA BİLƏR
AZƏRTAC xəbər verir ki, Röyter agentliyinin yaydığı xəbərə görə, Nigeriya hökuməti martda gözlənilən Günəş tutulmasına görə əhalinin naharahatlıq keçirəcəyi barədə xəbərdarlıq etmişdir. Ölkənin informasiya naziri Frenk Nveke xatırlatmışdır ki, 2001-ci ildə Ay tutulması ölkənin şimalındakı Borno ştatında iğtişaşlara gətirib çıxarmışdı, çünki adamlar nələr baş verdiyini bilmirdilər. Nigeriyanın şimalında, əsasən, müsəlmanların yaşadıqları Mayduquri və Barma şəhərlərində əhali Ay tutulmasını Tanrı cəzası kimi qəbul etmişdir. Yer kürəsinin kölgəsi Ayın diski üzərinə düşən kimi bir qrup müsəlman gənc “Allahu Əkbər!” şüarı ilə içkixanaları talan etməyə başlamışdır. Nəticədə 40-dan çox restoran, bar, pivəxana yandırılmışdır. Bəzi adamlar tutulmanı yaxınlıqda yaşayan yaman adamların əməlləri kimi qəbul etmişlər.
Nigeriyada Günəş tutulması martın 29-da gözlənilir. Nazir həmvətənlərini əmin etmişdir ki, bu təbiət hadisəsində qorxulu heç nə yoxdur. O demişdir: “Tutulma heç bir ziyan gətirməyəcəkdir, yalnız sosial və psixoloji narahatlıq mümkündür”.
