NİJNİ NOVQORODDA AZƏRBAYCAN ÜÇÜN “DƏDƏ QORQUD” TANKERİ SUYA SALINDI

26.05.2006 [15:50]
Çap et
A⁺ A^-

AZƏRTAC “Novosti” agentliyinə istinadla xəbər verir ki, Nijni Novqorodun “Krasnoye Sormovo” zavodunda Azərbaycan Dövlət Xəzər Gəmiçiliyinin sifarişi ilə inşa olunmuş neftdaşıma tankeri mayın 26-da suya salınmışdır. “Çay-dəniz” tipli yeni gəmi “Dədə Qorqud” adlanır.

Zavodun Baş direktoru Nikolay Jarkov təntənəli mərasimdə çıxış edərək bildirmişdir ki, müəssisənin Azərbaycanla əməkdaşlığının 103 illik tarixi var. Bu illər ərzində Azərbaycan üçün 70-dən çox tanker inşa olunmuşdur. O demişdir: “Təkcə son dörd ildə biz Xəzər Gəmiçiliyi üçün yeddi tanker və bir yük teploxodu inşa etmişik”.

“Dədə Qorqud” tankeri Xəzər Gəmiçiliyi ilə 2002-ci ilin oktyabrında bağlanmış müqavilə çərçivəsində inşa edilən beşinci və sonuncu gəmidir. Üç tanker - “Prezident Heydər Əliyev”, “Babək” və “Şah İsmayıl Xətai” gəmiləri artıq sifarişçiyə verilmişdir. Dördüncü gəmi - “Koroğlu” tankeri bu ilin martında suya salınmışdır.

Gəmilər suya salındıqdan sonra tam inşa ediləcək və sınaqdan çıxarılacaqdır.