NİKİTİN ADINA KOLXOZUN SƏDRİ ALEKSEY KOZLOVTSEVİN ÇIXIŞI
- Hörmətli cənab Prezident!
Hörmətli Mehriban xanım!
Biz kənd sakinləri Sizi İvanovka torpağında salamlamağa şadıq, bu, bizim üçün böyük şərəfdir. Nəsillərin əlaqələri qırılmır, əksinə, davam edir. Sizin atanız, əziz ümummilli liderimiz Heydər Əliyeviç Əliyev Zərifə xanımla birlikdə kəndimizdə qonaq olmuşlar. Bu, o vaxt İvanovka üçün şərəf idi. İndi isə xüsusilə şərəfdir ki, bir ayın ərzində biz Sizinlə ikinci dəfə görüşürük. Biz buna çox şadıq.
Heydər Əliyev bizim camaata həmişə kömək edirdi, bizi həmişə dəstəkləyirdi. Bu gün belə bir təsərrüfatı saxlaya bilməyimiz, ilk növbədə, hörmətli Heydər Əliyeviçin, indi isə İlham Heydəroviçin xidmətidir. Buna görə çox sağ olun.
İlham Heydəroviç, sülhsevər siyasət apardığınıza, regionların sosial-iqtisadi inkişafı proqramını həyata keçirdiyinizə görə Sizə təşəkkür edirik. Məktəblərin, xəstəxanaların, uşaq bağçalarının tikintisinə dair proqram həyata keçirən Mehriban xanıma təşəkkürümüzü bildiririk.
İvanovka camaatı, dediyim kimi, son bir ayda kəndimizdə iki dəfə olan Prezidentimizi salamlamaqla yanaşı, Əli Kərimlinin himayə etdiyi gənclər hərəkatının separatçılıq fəaliyyətini pisləyir. İvanovka camaatı onları pisləyir və bu gün belə qüvvələrə Azərbaycan xalqı arasında yer yoxdur.
Bir daha demək istəyirəm ki, Sizi bu torpaqda salamlamağa çox şadıq və əgər vaxtınız varsa, Sizi təsərrüfatımıza baxmağa dəvət edirəm. Çünki nailiyyətlərimiz, fəaliyyətimizin bəhrəsi var.
İndi buraya toplaşmış camaatın hamısı İvanovka kəndindəki Nikitin adına kolxozun əməkçiləridir. Sizinlə dayandığımız bu küçəyə, icazənizlə, Heydər Əliyeviçin adını vermək və İvanovka kəndində onun büstünü qoymaq istərdik. Biz burada həm də kolxozumuzun mərhum sədri Nikolay Vasilyeviç Nikitinin də büstünü qoymaq istərdik.
Sizin hamınıza bir daha səmimi qəlbdən təşəkkür edirik. Respublikamızın rifahı naminə uzun illər çalışmağınız üçün Tanrı Sizə möhkəm cansağlığı versin. Biz Azərbaycanda yaşayan ruslar, Azərbaycan ruslarıyıq. Azərbaycan Vətənimizdir və biz ölkəmizin vətənpərvərləriyik. Biz Sizi daim dəstəkləmişik və həmişə də dəstəkləyəcəyik. Allah canınızı sağ eləsin, Tanrı Sizə yar olsun.
Sonra çıxış edən pensiyaçı MARİYA ORLOVA Azərbaycan dövlətinin başçısına müraciət edərək dedi:
- Əziz cənab İlham Heydəroviç!
Əziz xanım Əliyeva!
Bu gün sizi kəndimizdə qarşılamağımıza çox şadıq. Düz 24 il əvvəl biz valideynləriniz Heydər Əliyeviçi və Zərifə Əzizovnanı qarşılamışdıq. Biz onda çox şad idik. Aradan çox vaxt keçib, lakin onlar ən yaxın və əziz insanlar kimi qəlbimizdə yaşayırlar. Xatirimdədir, mehmanxanaya gəldikdə, - Nikolay Vasilyeviç bizi oraya aparmışdı, - Zərifə Əzizovna dedi ki, mehmanxana onların çox xoşuna gəlir və burada qalacaqlar. Oturub çay içdilər, Heydər Əliyeviç dedi ki, yoldan gəlmişik, indi bir az dincimizi alaq. Sonra o, Nikolay Vasilyeviçə dedi ki, vaxt təyin etsin, gedib obyektlərə baxaq. Zərifə xanım isə mənə dedi ki, bizim İvanovkaya baxmaq istəyir. Dedim, “Buyurun”. Biz bütün kəndi gəzdik, o, camaatla hal-əhval tutur, dolanışıqları, iş-gücləri ilə maraqlanırdı. Həmkəndlilərimiz dedilər ki, çox yaxşı yaşayırlar. Bizim evimizə də gəldik, o, evə, həyət-bacaya baxdı. Sonra biz Nikolay Vasilyeviçgilə getdik, bizi onun arvadı Anna Timofeyevna qarşıladı, vaxt tapıb onlara təşrif gətirdiyinə görə Zərifə Əzizovnaya təşəkkür etdi. Mən dedim: “Zərifə xanım, biz getməliyik, çünki Heydər Əliyeviç tezliklə gəlməlidir”. Biz getdik, 15-20 dəqiqədən sonra Heydər Əliyeviç gəldi, çox şən idi, gülürdü. O dedi: “Mər hər yeri, bütün müəssisələri öz gözümlə gördüm, heyran qaldım ki, bütün bunlar təkcə kənd camaatının öz əlləri ilə yaradılıb, bütün obyektlər lazımi avadanlıqla təchiz edilib”. O, sanki nağılı xatırladan kolxozun rəhbərinin xidmətlərini də vurğulayaraq dedi ki, “əgər respublikada mənim 15-20 nəfər belə rəhbər işçim olsaydı, çox razı qalardım”. Onlar gedəndə Heydər Əliyeviç məni qucaqlayıb dedi: “Biz sizdən, bizi necə qarşılamağınızdan, qonaqpərvərliyinizdən çox məmnun olduq”. Respublikanın bütün rəhbərliyi də Heydər Əliyeviçlə birlikdə gəlmişdi. Qonaqpərvərliyimizdən onlar da çox razı qaldılar.
İlham Heydəroviçə atası kimi müdrik olmağı arzulayıram. Kəndimizi necə varsa, eləcə də saxlamağa kömək edin. İndi çox evlər satılır. Lakin istəyirik ki, bu evlər uşaqlarımıza, nəvə-nəticələrimizə qalsın. İlham Heydəroviç, indi isə icazə verin, yanınıza gəlim, əlinizi sıxım, Sizə möhkəm cansağlığı arzulayım, ən xoş diləklərimi bildirim. Heydər Əliyeviçə və Zərifə Əzizovnaya Tanrıdan rəhmət diləyirəm. İlham Heydəroviçə isə hələ çox-çox illər respublikamızın lideri olmasını arzu edirəm.
X X X
Kənd xəstəxanasının cərrahı MƏHƏMMƏD ƏSGƏROV dövlətimizin başçısına müraciətlə dedi:
- Əziz İlham Heydər oğlu!
Sizi ürəkdən salamlayıram, bizi xatırladığınıza və bizə qayğı göstərdiyinizə görə çox sağ olun. Heydər Əlirza oğlunun 1981-ci ildə kəndimizə gəldiyini, onun çıxışını xatırlayıram, Nikolay Vasilyeviçin o zaman böyük öhdəliklər götürdüyünü xatırlayıram. Sizin gəlişiniz də bizim üçün böyük bayram, böyük hadisədir və qəlbimizdə əbədi qalacaqdır.
Diqqətinizə görə təşəkkür edirəm.
X X X
Prezident İlham Əliyev görüşdə nitq söylədi.
Bölmənin digər xəbərləri
