Niko Rosberq: “Mercedes” Bakıda “Red Bull”a qarşı protest qaldıra bilər
Bakı, 31 may, AZƏRTAC
2016-cı il Formula 1 yarışmasının çempionu Niko Rosberq avstriyalılara məxsus bolidin qanadının “əyilgən” olması səbəbindən “Mercedes” ilə “Red Bull” arasında yaranan münaqişə barədə fikrini bildirib.
AZƏRTAC xəbər verir ki, “GrandPX.news” N.Rosberqin bu sözlərini sitat gətirir: “Eşitdiyimə görə, Toto Volff (“Mercedes” komandasının rəhbəri) “Red Bull” ilə deyil, “Ferrari” ilə mübarizə aparmağa üstünlük verdiyini söyləyib. Bu, onun tərəfindən heç də yaxşı səslənmir.
Toto “Red Bull”un rəhbəri Kristian Horner barədə heç də yaxşı fikirdə deyil. Zənnimcə, biz həqiqətən də “Merdeces” ilə “Red Bull” arasında baş verənləri görə biləcəyik.
Hər şey “Mercedes”in “Red Bull”un arxa qanadına dair qəti etirazını bildirib-bildirməyəcəyindən asılıdır. Toto artıq bunu etmək niyyətində olduğunu söyləyib və bu, Bakıda təşkil olunacaq növbəti yürüşdə baş verə bilər.
Bu, Formula 1 üçün mühüm mövzudur. Fikrimcə, əgər Volff bu addımı atarsa, o halda “Red Bull” da buna laqeyd qalmayacaq”.
Xatırladaq ki, Azərbaycan Qran-Prisi iyunun 4-6-da Bakıda şəhər trasında keçiriləcək.
Bölmənin digər xəbərləri
