MƏDƏNİYYƏT
NİZAMİ MUZEYİNDƏ ŞAİRƏ NİGARLA GÖRÜŞ KEÇİRİLMİŞDİR
Muzeyin direktoru, Milli Məclisin deputatı, professor Rəfael Hüseynov tədbiri açaraq dedi: Azərbaycan ədəbiyyatının tarixində elə şəxsiyyətlərimiz olub ki, öz ana dilindən əlavə başqa dillərdə də gözəl bədii nümunələr yaratmışdır. Klassik ədəbiyyatımızda Nəsiminin, Füzulinin, Zülfüqar Şirvaninin, daha sonralar Maqsud və Rüstəm İbrahimbəyov qardaşlarının, Çingiz Abdullayevin və başqalarının simasında bunu görmək olar.
Natiq həmin ənənəni bu gün davam etdirən gənclər arasında Nigar Həsənzadənin adını xüsusi vurğuladı. Bildirdi ki, Nigar hazırda Londonda yaşayıb yaradır. Orada iki dildə (rus və ingilis) nəşr olunan ilk kitabı oxucular tərəfindən maraqla qarşılanıb. İngilis ədəbiyyatçısı Riçard Mak Keyn kitaba yazdığı ön sözdə həmyerlimizin yaradıcılığını görkəmli rus şairələri Alla Axmatova və Marina Svetayeva poeziyası ilə müqayisə edir.
Tədbirdə şair-tərcüməçi Səlim Babullaoğlu, muzeyin əməkdaşları Şəfəq Əlibəyli, Nigar Qayıbova və başqaları çıxış edərək Nigar Həsənzadənin yaradıcılığından, şerlərindəki milli ruhdan, insan hisslərinin sənətkarlıqla tərənnüm olunmasından danışdılar.
Tanınmış şair Vahid Əziz şairənin şerlərindən etdiyi tərcümələri iştirakçıların diqqətinə çatdırdı.
Axırda Nigar Həsənzadə yeni şerlərini oxudu, tədbirin təşkilatçılarına və iştirakçılarına minnətdarlığını bildirdi.