Nurlan Niqmatulin: Azərbaycanın Zəfəri Avrasiya məkanında sabitliyin möhkəmləndirilməsi üçün yeni imkanlar yaradacaq
Bakı, 8 iyul, AZƏRTAC
Qazaxıstan Respublikası Parlament Məclisinin sədri Nurlan Niqmatulin Zəfər Günü münasibətilə Milli Məclisin sədri Sahibə Qafarovaya təbrik məktubu göndərib.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, məktubda Nurlan Niqmatulin Milli Məclisin sədrini və deputatlarını Azərbaycanın ərazi bütövlüyünün bərpası günü kimi qeyd olunan Zəfər Günü münasibətilə səmimi-qəlbdən təbrik edib. O, Azərbaycan xalqının bu Zəfərinin Cənubi Qafqazda iqtisadi əməkdaşlığın hərtərəfli inkişafı və Avrasiya məkanında sabitliyin möhkəmləndirilməsi üçün yeni imkanlar yaradacağına inamını bildirib.
Parlament sədri Qazaxıstan və Azərbaycan arasında mövcud olan dostluq münasibətlərinin və sıx parlament əlaqələrinin xalqlarımızın işıqlı gələcəyi naminə bundan sonra da sürətlə inkişaf edəcəyinə əminliyini ifadə edib.
Məktubunun sonunda Nurlan Niqmatulin Milli Məclisin sədrinə cansağlığı, uğurlar, qardaş Azərbaycan xalqına əmin-amanlıq və firavanlıq arzulayıb.
Bölmənin digər xəbərləri
