OĞRULAR PATRİK VİYERANIN VİLLASINI QARƏT ETMİŞLƏR

25.05.2006 [14:58]
Çap et
A⁺ A^-

AZƏRTAC Bi-Bi-Si-yə istinadla xəbər verir ki, Fransa polisi İtaliyanın “Yuventus” klubunun yarımmüdafiəçisi olan həmvətəni Patrik Viyeranı soymaq məqsədi ilə qazdan istifadə edən qarətçiləri axtarır. Polisin rəsmi nümayəndəsi demişdir ki, oğrular futbolçunu və onun ailə üzvlərini yatırtmaq üçün villanın sərinləşdirmə sisteminə qaz buraxmışlar.

“Arsenal” klubunun keçmiş oyunçusu, 29 yaşlı Viyera Almaniyada keçiriləcək dünya çempionatı ərəfəsində yığma komandası ilə məşq etmək üçün vətənə qayıtmışdır. Qarətçilər zinət əşyalarını oğurlayaraq, evi futbolçunun “Mersedes” markalı avtomobilində tərk etmişlər.

Polis həmin avtomobili Nitsa şəhərində tapmışdır.

Xatırladaq ki, Patrik Viyera “Yuventus”a keçməzdən əvvəl 9 mövsüm “Arsenal” klubunda oynamışdır.