OĞUL ANATOLİ SOLOVYANENKO BAKI SƏHNƏSİNDƏ OPERA TAMAŞAYA QOYMAQ ARZUSUNDADIR
Ukraynanın görkəmli opera müğənnisi Anatoli Solovyanenko Azərbaycanda da məşhurdur. Dünyasını bu yaxınlarda dəyişmiş Anatoli Borisoviç Solovyanenkonu və ailəsini Bakı ilə, Azərbaycan xalqı və onun lideri Heydər Əliyev ilə səmimi dostluq və şəxsi rəğbət telləri bağlayırdı və indi də bağlayır. Bunu xatırlamaq kifayətdir ki, Milanın “La Skala” teatrında Müslüm Maqomayevlə birlikdə vokal stajı keçmiş A.Solovyanenko xalqımızın lideri ilə dostluğuna sadiq qalaraq və ona çox böyük hörmət hissi bəsləyərək, on illər sonra, 1998-ci ildə Prezident Heydər Əliyevin Kiyevdə də qeyd olunmuş 75 illiyi münasibətilə təntənəli konsertdə çıxış edərək, məhz Maqomayevlə duet oxumuşdur.
Anatoli Borisoviçin kiçik oğlu - o da Anatoli Solovyanenkodur - Bakını görməsə də, rəhmətlik atasının böyük rəğbət bəslədiyi Azərbaycana gəlmək arzusundadır. Ola bilsin, bu, həm də onunla bağlıdır ki, 1979-cu ildə məhz Bakıda, Azərbaycanda Ukrayna mədəniyyəti günləri zamanı onun anası, Anatoli Borisoviçin ömür-gün yoldaşı Svetlana Dmitriyevna qəfildən özünü pis hiss etdikdə və respublikamızın rəhbəri Heydər Əliyevin şəxsi göstərişi ilə xəstəxanaya qoyularkən məlum olmuşdu ki, o, hamilədir. Demə, gələcək körpə Anatoli imiş. O vaxtdan bəri Solovyanenkolar ailəsi Heydər Əliyevi özlərinin yaxın və xeyirxah dostu hesab edirlər.
İndi oğul Anatoli Solovyanenko tanınmış opera rejissoru, Ukraynanın ən gənc əməkdar incəsənət xadimi, “Anatoli Solovyanenko ilə antrakt” telelayihəsinin müəllifi və aparıcısı, Zaltsburq Musiqi Akademiyasının diplomantıdır. Onun tamaşaya qoyduğu operalar ölkənin səhnələrində uğur qazanır, bu operalarda “La Skala”nın və dünyanın digər məşhur teatrlarının solistləri iştirak edirlər.
A.Solovyanenko AZƏRTAC-ın müxbirinə məxsusi müsahibəsində demişdir ki, dünya opera sənəti nümunələrindən birini Azərbaycan Dövlət Akademik Opera və Balet Teatrının səhnəsində də tamaşaya qoymaq arzusundadır.
O, Azərbaycan Respublikasının Prezidenti Heydər Əliyevə məktubunda öz planlarından yazmış və atasının 70 illiyi ilə əlaqədar bu yaxınlarda çapdan çıxan “Anatoli Solovyanenko. Bütün dünya ilə danışmış səs” kitabını dövlətimizin başçısına hədiyyə göndərmişdir. O, Azərbaycan dövlətinin rəhbərindən öz məktubuna cavab almışdır. Anatoli Anatolyeviçin icazəsi ilə cavab məktubunu oxucularımıza təqdim edirik.
“Hörmətli Anatoli Anatolyeviç!
Məktuba, xoş sözlərə və gözəl kitaba görə çox sağ olun. Sizin atanız gözəl müğənni və gözəl insan idi. Onun hər bir çıxışı böyük bayram təəssüratı bağışlayırdı. Atanızın nadir səsi və çox böyük insani cazibədarlığı mənim yaddaşıma həmişəlik həkk olmuşdur. Nəşr etdirdiyiniz kitab Anatoli Borisoviç Solovyanenko şəxsiyyətinin və istedadının çoxşaxəliliyinə və özünəməxsusluğuna daha bir sübutdur.
Sizin dünya klassikası nümunələrindən birini Azərbaycan Dövlət Akademik Opera və Balet Teatrının səhnəsində tamaşaya qoymaq arzunuz hər cəhətdən dəstəklənməyə layiqdir. Ümidvaram ki, bu layihənin həyata keçirilməsi Azərbaycan-Ukrayna mədəni əlaqələrinin inkişafı işinə yeni töhvə olacaqdır.
Mənim ən xoş arzularımı ananıza, Svetlana Dmitriyevnaya çatdırmağınızı xahiş edirəm. Sizin bütün gözəl ailənizə xoşbəxtlik, cansağlığı, uğurlar arzulayıram.
Hörmətlə,
Heydər Əliyev
Azərbaycan Respublikasının Prezidenti”.
Anatoli Anatolyeviç demişdir ki, onun layihəsini Azərbaycanın Ukraynadakı səfirliyi də bəyənmişdir. Səfir Tələt Əliyev isə Azərbaycanın opera rejissorlarından və ya baletmeysterlərindən birinin Kiyev Milli Opera və Balet Teatrının səhnəsində tamaşa qoyması təklifini irəli sürmüşdür.
Zeynal Ağazadə
AZƏRTAC-ın xüsisi müxbiri
Kiyev
Bölmənin digər xəbərləri
