Oktyabrın 15-də beynəlxalq miqyasda üç əlamətdar gün qeyd edilir
Bakı, 15 oktyabr, AZƏRTAC
Oktyabrın 15-də beynəlxalq ictimaiyyət üç əlamətdar günü qeyd edir. AZƏRTAC xəbər verir ki, dünya miqyasında, o cümlədən Azərbaycanda həmin günlərlə bağlı müxtəlif tədbirlər keçirilir.
Ümumdünya Süd Vəzi Xərçəngi ilə Mübarizə Günü
Bu mühüm məlumatlandırma günü 47 Avropa ölkəsindən üzvləri olan “Europa Donna” müstəqil qeyri-kommersiya təşkilatının təşəbbüsü ilə süd vəzi xərçəngi haqqında ictimaiyyətin məlumatlılığını artırmaq, onun erkən aşkarlanmasının vacibliyini vurğulamaq məqsədilə Avropanın hər yerindən kiçik bir qrup qadın tərəfindən 1994-cü ildə təsis olunub. Ümumdünya Səhiyyə Təşkilatının qərarı ilə Süd Vəzi Xərçəngi ilə Mübarizə Günü hər il oktyabrın 15-də qeyd edilir, eyni zamanda, Azərbaycan da daxil olmaqla, bir çox ölkədə Süd Vəzi Xərçəngi ilə Mübarizə Aylığı keçirilir.
Onkoloji qadın xəstəlikləri sırasında süd vəzi xərçəngi birinci yeri tutur. Hər il dünyada 10 milyondan çox qadın həmin xəstəliyə mübtəla olur. Bəzən bu xəstəliyə kişilər arasında da təsadüf edilir. Gecikmiş diaqnostika və vaxtında aparılmayan müalicə mənfi terapevtik nəticələrə aparıb çıxarır.
Ümumdünya Əl Yuma Günü
UNICEF 2008-ci ildə BMT Baş Assambleyasının iclasında hər il oktyabrın 15-i tarixini rəsmi olaraq Ümumdünya Əl Yuma Günü elan edib. BMT və Ümumdünya Səhiyyə Təşkilatı (ÜST) ekspertlərinin qənaətinə görə çirkli əllərdən yaranan xəstəliklər qlobal səviyyədə fəlakətə yol açır, insan orqanizminə bir çox qorxulu xəstəliklərin patogenləri: vəba, pnevmoniya virusu, hepatit, qrip və kəskin respirator virus infeksiyaları daxil olur. Bu problem Asiya və Afrika ölkələrində uşaq ölümləri sayının yüksək olmasının əsas səbəbidir. Belə ki, əl yumamaq difteriya, sətəlcəm, hepatit, qrip, göz infeksiyası, qotur xəstəliyi və müxtəlif növ göbələk xəstəliklərinin yaranmasının əsas faktorlarından biridir. UNICEF-in məlumatına görə dünyada hər gün təkcə ishaldan beş minə yaxın uşaq tələf olur. Bu səbəbdən ilk baxışda adi görünən bu gigiyenik prosedur hər gün minlərlə uşağın həyatını xilas edir.
Bir çox ölkədə mətbuat orqanları gigiyena qaydalarına əməl etmə kampaniyaları keçirir. Azərbaycanda da bu yöndə maarifləndirmə tədbirləri aparılır. Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən əhali üçün mütəmadi olaraq xəstəliklərin profilaktikası məqsədilə çap materialları hazırlanır, məktəblərdə maarifləndirmə işi aparılır.
Beynəlxalq Kənd Qadınları Günü
BMT-nin qlobal və beynəlxalq günlər sisteminin bir hissəsidir və hər il qeyd olunur. Beynəlxalq Kənd Qadınları Günü BMT Baş Assambleyası tərəfindən 2008-ci ilin fevralında “Kənd ərazilərində qadınların inkişafı” adlı qətnamədə elan edilib.
Bu günün əsas məqsədi kənd qadınlarının həyati rolunu, onların aqrar sektorun və kənd yerlərinin inkişafının sürətləndirilməsinə, ərzaq təhlükəsizliyinin yaxşılaşdırılmasına və yoxsulluğun aradan qaldırılmasına töhfələrini tanımaqdır.
Azərbaycan Kənd Qadınları Assosiasiyası bu əlamətdar gün münasibətilə hər il ölkəmizin müxtəlif bölgələrində tədbirlər təşkil edir. Bu tədbirləri təşkilində məqsəd aqrar sektorun inkişafına töhfə verən zərif cinsin nümayəndələrinin fəaliyyətini qiymətləndirmək, onlara kömək etməkdir.
Bölmənin digər xəbərləri
