ÖLKƏDƏ 1 MİLYONDAN ÇOX PENSİYAÇI VARDIR
Dövlət Sosial Müdafiə Fondunun (DSMF) sədri Səlim Müslümov AZƏRTAC-ın müxbirinə demişdir ki, 2006-cı ildən ölkəmizdə yeni pensiya sistemi tətbiq olunacaqdır. Hazırda pensiyaçıların siyahısı dəqiqləşdirilir. 2005-ci il oktyabrın 1-nə olan məlumata görə, 1 milyon 357 min 383 pensiyaçıdan 1 milyon176 min 470 nəfəri əmək pensiyaçısı, 180 min 913 nəfəri isə sosial pensiyaçıdır. Onların 785,2 min nəfəri, yaxud 58 faizi yaşa, 394 mini və ya 29 faizi əlilliyə, 164,5 mini və ya 12,1 faizi ailə başçısını itirdiyinə, 13,8 mini və ya 1 faizi isə xidmət illərinə görə pensiya alır. Bundan əlavə, hazırda DSMF-nin qeydiyyatında 100 min nəfərdən çox işləyən pensiyaçı vardır ki, onların da 82 min 550 nəfəri yaşa, 17 min 600-ü əlilliyə, 116 nəfəri ailə başçısını itirdiyinə, 10 nəfəri isə xidmət illərinə görə pensiya alanlardır.
S.Müslümov bildirmişdir ki, yeni sistem pensiyaların müəyyən olunmasında, verilməsində mövcud problemlərin həllini asanlaşdıracaqdır.
Bölmənin digər xəbərləri
