Ölkəmizdə qeyri-neft sektorunun iqtisadiyyatdakı payı daha da artacaq
Bakı, 13 yanvar, AZƏRTAC
Prezident İlham Əliyevin rəhbərliyi ilə hökumətin həyata keçirdiyi iqtisadi islahatlar öz bəhrəsini verməkdədir. Qlobal pandemiya və dünya iqtisadiyyatındakı tektonik vəziyyətə baxmayaraq, Azərbaycanda hökumətin reallaşdırdığı iqtisadi proqram inqilabi xarakter daşıyır. Çünki bütün dünyada izlənən iqtisadi sıxıntılar, iqtisadiyyatların kiçilməsi, qiymətlərin bahalaşması fonunda qeyri-neft sektorunun milli iqtisadiyyatdakı payının artırılması kursu ciddi siyasi iradə tələb edir.
Bunu AZƏRTAC-a açıqlamasında Milli Məclisin deputatı Elnur Allahverdiyev deyib.
Deputat bildirib ki, Prezident İlham Əliyevin yerli telekanallara verdiyi müsahibədə səsləndirdiyi statistik göstəricilər qarşıdakı illərdə bu istiqamətdə daha nikbin nəticələr gözləməyə əsas verir. Dövlətimizin başçısının səsləndirdiyi rəqəmlər əmin olmağa əsas verir ki, milli iqtisadiyyatda enerji daşıyıcılarının dominantlığı azalmağa doğru gedəcək, real, istehsala əsaslanan sektorun payı artacaq. Məsələn, qeyri-neft sektorunda 7,2 faizlik yüksəliş qeydə alınıb və bu, olduqca ciddi rəqəmdir. Nəzərə alsaq ki, ümumi iqtisadi artım 5 faizdir və bu rəqəm də dünyadakı proseslər fonunda olduqca müsbət nəticədir, deməli, qeyri-neft sektorundakı irəliləyiş də təqdirəlayiqdir”.
E.Allahverdiyevin fikrincə, qeyri-neft sektoru artım göstərməyə davam edəcək və bu, o deməkdir ki, hökumətin siyasəti reallığa əsaslanır. O, qeyd edib ki, Hökumətin başlıca məqsədi daxili tələbatı təmin etmək və bundan sonra xarici bazara çıxmaqdır. Məsələn, ötən ildə qeyri-neft ixracı 40 faizdən çox olub. Bu, ilk növbədə kənd təsərrüfatı məhsullarının ixracı ilə bağlıdır. Azərbaycan ulu öndər Heydər Əliyevin rəhbərliyi ilə keçmiş SSRİ məkanında ilk aqrar islahat həyata keçirən ölkədir. Bu gün biz bunun bəhrəsini görürük.
Deputat qarşıdakı illərdə qeyri-neft sahəsinin çəkisinin daha da artacağını və bu istiqamətdə ciddi gözləntilərin olduğunu diqqətə çatdırıb: “Ölkəmiz bu gün ət və südə olan tələbatın təqribən 80-90 faizini özü təmin edir. Taxılın bir qismini xaricdən idxal edirik, bu da reallıqdır. Əhalimiz artır, pandemiyadan qabaq turizm sahəsində ciddi nailiyyətimiz var idi, yəni gələn turistlər hesabına da çörəyə tələbat çoxalır. Əkin sahələrinin sahəsini nəzərə alsaq, bu ehtiyacı tam ödəmək qeyr-mümkündür.
Prezident İlham Əliyev müsahibəsində bildirdi ki, hətta azad olunmuş torpaqlarda taxıl əkinini təşkil etsək belə, yenə də xarici bazardan asılı olacağıq. Qalan kənd təsərrüfatı məhsulları ilə tələbatı isə təbii ki, özümüz təmin edə biləcəyik.
Azad olunmuş torpaqlar tam şəkildə istifadə ediləndən sonra və pandemiyanın aradan qalxması ilə turizm sektorunun da işə düşməsi qeyri-neft sektorunda özünü konkret rəqəmlərlə göstərəcək. Tam əminliklə söyləmək olar ki, qeyri-neft sektorunun iqtisadiyyatdakı payı daha da artacaq. Bunu əminliklə söyləmək olar”.
Bölmənin digər xəbərləri
