Ölkəmizin qlobal əməkdaşlığa açıq dövlət olduğu bir daha təsdiq olundu – ŞƏRH
Bakı, 26 may, AZƏRTAC
Azərbaycan ev sahibliyi etdiyi Ümumdünya Şəhərsalma Forumununun 13-cü Sessiyasını (WUF13) yüksək səviyyədə başa vurdu. Bakı toplantısı 176 ölkədən 58 mindən artıq iştirakçının qatıldığı və bu günədək keçirilmiş ən böyük Ümumdünya Şəhərsalma Forumu kimi tarixə düşdü. Ev sahibi ölkənin təşəbbüsü ilə keçirilən Liderlərin Bəyanatlar Sessiyasında 27 dövlət və hökumət başçısının iştirakı da tarixdə ilkdir.
Bunu AZƏRTAC-a açıqlamasında “Yaşıl Dünya” Ekoloji Maarifləndirmə İctimai Birliyinin sədri Elman Cəfərli deyib.
O bildirib ki, müxtəlif ölkələrdən rəsmi nümayəndələrin, vətəndaş cəmiyyəti fəallarının, beynəlxalq təşkilatların nümayəndələrinin, şəhərsalma üzrə mütəxəssislərin qatıldığı forum şəhərlərə miqrasiya və məskunlaşma prosesləri, təhlükəsiz şəhər quruculuğu ilə bağlı müzakirə platformasına çevrildi:”Bakı forumunda sürətli şəhərləşmə, dayanıqlı icmaların formalaşdırılması və mənzil problemləri ilə bağlı dünyanı narahat edən problemlər müzakirə olundu, mühüm mesajlar verildi. Forumda “Baku Call to Action” sənədinin qəbul edilməsi, postmünaqişə dövründə bərpa və yenidənqurma məsələlərinin önə çıxarılması, təhlükəsiz və inklüziv şəhər mühitinin təşviqi WUF13-ün əsas uğurlarından sayıla bilər. Ölkəmizin qlobal əməkdaşlığa açıq, dayanıqlı inkişaf strategiyasına və “yol xəritəsi”nə malik dövlət olduğunu bir daha təsdiq olundu. Tədbirdə Azərbaycanın Qarabağda və Şərqi Zəngəzurda Böyük Qayıdış proqramı çərçivəsində həyata keçirdiyi kompleks tikinti-quruculuq və yenidənqurma layihələri, özəlliklə ekoloji dayanıqlılığa əsaslanan yaşıl nəqliyyat sistemlərinin qurulması, müasir infrastruktur yanaşmaları və rəqəmsal idarəetmə modellərinə söykənən smart şəhər təşəbbüsləri tədqim edildi. Münaqişədən zərər görmüş ərazilərin bərpası, məcburi köçkünlərin doğma torpaqlarına qayıdışı və “Ağıllı şəhər” ilə “Yaşıl enerji” modellərinin tətbiqi Azərbaycanın humanist niyyətini ortaya qoydu”.
Elman Cəfərli vurğulayıb ki, hər gün ətraf mühitin, torpaq örtüyünün, su mənbələrinin çirkləndirildiyi, ağır raketlərin atıldığı və nəticədə şəhərlərin dağılması ilə müşayiət olunan hərbi toqquşmaların baş verdiyi dövrdə yaşayırıq. Dünyamızın bugünü və gələcəyi ilə bağlı narahatlıqlar artır. Belə qeyri-sabit, geosiyasi gərginliklərin, münaqişələrin yaşandığı dövrdə WUF13-ün keçirilməsi xüsusi əhəmiyyət kəsb edib. “Bakı forumu rəsmi qurumları, QHT sektorunu, sahibkarları, yerli icmaları, gəncləri, qadın qruplarını, elmi çevrələri, beynəlxalq maliyyə institutlarını birgə şəhərsalma perspektivi ətrafında birləşdirən platformadır. Bakıda aparılan müzakirələr göstərdi ki, ictimai sabitliyin, dayanıqlı iqtisadi inkişafın təməli ədalətli həll olmalıdır. Qeyd edək ki, bu məsələ qlobal Bakı forumu çərçivəsində qəbul olunan “Baku Call to Action” sənədində də əksini tapir. Sənəd rəsmi qurumları, qlobal təşkilatları, icmaları birgə fəaliyyətə səsləyir. Ədalətli, hamı üçün əlçatan və təhlükəsiz mənzil təminatı, müasir urbanistik layihələrin nəqliyyat, infrastruktur, ekologiya və sosial müdafiə ilə inteqrasiyası da sənədin prioritetlərindəndir. WUF13-ün əsas mövzularından biri də “Dünyanı məskunlaşdırmaq: Təhlükəsiz və dayanıqlı şəhərlər və icmalar” idi. Bu müzakirələr çərçivəsində “Bakı Çağırışı”nın qəbul edilməsi mühüm nailiyyətdir. Bu sənəd əlçatan və təhlükəsiz mənzil siyasətini gücləndirməyə çağırış edir. Həmçinin iqlimədavamlı və cəmiyyətin bütün təbəqələrini əhatə edən dayanıqlı şəhər inkişafı şəhərsalmanı ilə bağlı icmalar, dövlətlər, şəhərlər və beynəlxalq təşkilatlar arasında əməkdaşlığın gücləndirilməsini nəzərdə tutur. “Bakı Çağırışı”, həmçinin evsizlik problemini qlobal prioritet kimi önə çıxarır. Bu gün dünyada 3 milyardan artıq insan standartlara cavab verməyən, qeyri-adekvat mənzillərdə yaşayır. Bundan çıxış yolu kimi sosial əlçatan mənzil layihələri icra olunmalı, aşağı və orta təbəqə üçün dövlət dəstəkli mənzil proqramları həyata keçirilməli, ipoteka və kirayə bazarında subsidiyalaşdırma genişləndirilməli, su, kanalizasiya, elektrik və yol infrastrukturunun yaxşılaşdırılmalı, bəzi hallarda açıq qalan, illərlə həllini gözləyən hüquqi status məsələləri həll edilməlidir”, - deyə E.Cəfərli qeyd edib.
Müxbir – Göyçək Mahmudlu
Bölmənin digər xəbərləri
